Durante conferencia di prensa extraordinario emiti pa Gobierno di Aruba diabierna mainta, reportero Marko Espinoza a trece un punto dilanti na e prome mandatario relaciona cu e Rijkswet. Espinoza a señala cu tawata tin tardanza pa yega na e acuerdo aki. Mas pasobra for di aña pasa gremio y oposicion tawata bogando pa gobierno tuma e acuerdo pa e Rijkswet, si tawata “bale la pena” pa por spaar na interes.
Prome Minister mr. Evelyn Wever-Croes a cuminsa su contesta, mustrando riba un propaganda cu ta menciona “lo bueno se hace esperar”. Segun e mandatario “Indudablemente e tardanza ta yudando”, pasobra locual tawata tin na mesa na october 2023 tawata simplemente RAFT y a cambio ta haya interes abao di 6.9% pa 5.1% ,te dia cu e RAFT ta cla, ta baha bira na 3.4%.
Awor cu a cambia exigencia di RAFT, ta bari esaki for di mesa, y cu na mes momento RAFT tambe “ta muri su morto” natural”. Lo bin awor un Rijkswet “hybrid”.
E politico di otro banda a bisa cu lo principal ta, no solamente interes riba e fiansa di e periodo di pandemia (Covid). E prome mandatario a mustra cu e fiansa a baha y e posibilidad pa refinancia ta keda existi. E debe externo di Aruba lo conoce un financiamento cu interes abao, cu lo trece un alivio grandi riba e presupuesto di Aruba. Na cierto momento lo por conoce alivio, den sentido cu lo por spaar en total mas di 100 miyon florin, pues ta trata di hopi placa di acuerdo cu Prome Minister.
Wever-Croes a agrega cu e parti di e deal aki no tawata riba mesa durante october 2023. Definitivamente esaki ta un ehempel clasico di “tuma bo paso firme, mustra bo punto”. Durante october aña pasa no por a acepta loke nan (Hulanda) a bin cu ne. Aruba a tuma e posicion cu ta encera un interes mas halto di 6.9% y mesora a bay “re-strategia”. E politico a mustra cu a bay busca “un otro forma mientras nos fianza publico tawata pasando door di pruebanan importante grandi.” Evaluacionnan grandi a tuma luga pa loke ta trata supervision financiero pa a yuda nos (Aruba). Ta mustra cu “awor si tawata tin apertura pa esaki. Definitivamente loke tin awo, tawata bale la pena warda p’e.”
Tambe mirando e situacion actual na Hulanda unda cu tin un gobierno cu ta demisionario y keto bay ta den proceso di gobernacion, pues e gobierno actual cu ta demisionario por atende solamente asuntonan den proceso (lopende zaken), pero a opta pa firma e acuerdo.
Riba e punto aki Wever-Croes a mustra cu cambio di gobernacion Hulandes a hunga un rol y su persona a experencia dos Secretario di Estado durante dos gobierno na Hulandes tanto Raymond Knops y Alexandra van Huffelen. E mandatario a agrega: “Mi a pensa cu pa Aruba ta mas prudente pa tin un acuerdo firma cu e gobierno saliente, prome cu e gobierno nobo bin”. No sa ainda con e constelacion nobo lo ta y ki atencion lo pone pa Aruba. Esaki tambe a hunga un rol den e evaluacion aki p’asina nos “tin algo firma”, pa asina na momento cu un gobierno nobo tuma over na Hulanda, tin un acuerdo caba firma “en principio”. Despues ta mira con leu yega cu nan y e interes ta baha mesora. Esey ta un punto cu a hunga un rol importante.
