Diabierna awo, dia 3 di februari, lo tuma luga e evento tan spera ‘Ban Bula’Den na Drive-In’.
Esaki ta e prome biaha cu nan di Gloria Movies Dining Entertainment & Play ta organisa e evento aki, conoci bou di e nomber di Battle of the Bands. Asina Devin de Veer, di Gloria Movies Dining Entertainment & Play a cuminsa na bisa.
Lo tin un total di cuater banda cu lo competi pa e premio di cinco mil florin, cual nan ta ‘NFuzion, Groove Masters, Youth X-treme y Buleria. Pero prome nan lo tin Robert JeanD’or y Su Solo Banda Show, caminda cu lo rindi homenahe na Robert JeanD’or, pa tur loke el a haci na nivel musical.
Mas aleu, Devin a agrega cu lo trek lot e mesun anochi aki, pa wak cua ta e banda cu lo cuminsa e show. Cada banda lo bin cu nan trailer, tur den un ronchi y e publico meymey den e ronchi. Y asina lo wak cual t’e banda cu lo duna nan miho show y e publico rib’e anochi lo por vota riba un website.
Desde diamars a cuminsa cu benta di e entrada, na balor di 10 florin. Nan ta conta cu 3500 persona. El a enfatisa cu e anochi aki ta un evento 18+.
Entrada ta obtenibel na The Movies @ Principal, diahuebs pa diadomingo di 5:00pm pa 10:00pm, The Movies @ Renaissance di 5:00pm pa 10:00pm y tambe na The Movies @Gloria di 10:00am pa 10:00pm, di dialuna pa diadomingo.
E anochi aki lo tin un bar y cushina bon surti. No lo permiti di bin cu auto cu cuminda y bebida.
Tur hende ta custuma cu Drive-In ta un luga unda cu por hay cu auto. Pero e anochi aki no ta bay ta permiti pa drenta cu auto. Rib’e anochi aki, ta keda na cada banda pa convence e pueblo di Aruba cu nan merece di ta e ganado di e cinco mil florin.
Por ultimo, Devin de Veer, di Gloria Movies Dining & Entertainment a bisa cu nan a cera un acuerdo cu Amigo Didi. Esaki ta un temporada cu hopi hende ta bebe y despues ta lubida di controla nan mes. P’esey nan a opta di yama Amigo Didi pa nan forma di e evento aki. Pa curasha tur hende cu nan por enjoy nan mes y toch na un manera responsabel.
Nan kier pa tur hende gosa di Carnaval, pero toch mester corda pa cuida tambe.
Tropical Bottling semper na nan eventonan ta recorda un y tur pa bebe responsablemente y p’esey tambe e ta aparece riba tur nan productonan. Tabata na su luga pa nan a uni na Amigo Didi.
