Aña a habri cu un disgusto bastante grandi di parti di trahadonan na Thiel Corporation. Diaranson mainta nan a sali riba un accion di protesta pa motibo di falta di cumplimento di parti di Thiel Corporation segun e trahadonan.
Francis Wester, Shopsteward di STA y trahado tambe na Thiel Corporation ta conta cu practicamente Thiel no a paga e salario manera mester ta fin di luna. Sigur cu hopi di nan ta baha trempan, riba 22 di december, na unda a kere nan lo ricibi pago pero nada a pasa.
“Nos a pensa cu toch di 27 pa 28 placa lo a pasa pa nos hay’e pa fin di luna, y ainda placa no a logra pasa nada.” Te cu ayera, diamars 2 di januari, a paga tur trahado 950 florin, cual no ta e salario completo. Esaki no a cay den bon tera n’e trahadonan cual hopi di nan tin cos pa paga, algun kier a pasa bon y trankil den temporada di december cual nan no por a haci.
Tin hende cu cas pa paga, y awor nan tin cu paga multa riba loke nan debe tambe. E trahadonan a bay den accion diaranson mainta y gerencia a bisa cu nan lo haci nan maximo esfuerso pa paga e salario di luna pasa. Mirando e situacion, sin embargo segun Wester, ta parce cu no por duna ningun garantia cu lo ta asina tampoco.
Awor lo bay warda un respuesta pa diaranson atardi mes y si no haya e respuesta aki ni pa mañan, lo bay tin cu bolbe tuma accion. Nan lo presenta trabao pero no lo traha te ora cu pago drenta. No ta prome biaha e empleadonan aki mester a confronta un situacion asina cu ta bin haya pago laat.
COS TA PINTA HOPI SCUR
Nos a puntra e empleadonan si nan a haya algun indicacion of sa si e compania lo kier sigui cu Thiel Corporation mirando tur e retonan aki.
“E kier sigui, pero nos mester ta realistico. Francamente cos ta pinta hopi scur p’e compania. Nan por bisa kico cu nan kier. Nan por rabia, boycott, kico cu nan kier bisa bo. Pero francamente, e ta pinta hopi scur pasobra maneho no tin.” Wester ta splica cu manera cos ta bayendo ta mustra no mucho positivo. Pasobra por ehempel, nan lo por pusha pa paga e trahadonan e placa cu debe nan awo pero despues e pregunta ta keda si nan lo por paga nan atrobe fin di luna. No tin contesta concreto riba esey. “Tin e cen supuestamente pa paga nos awo, pero fin di luna? Con nos ta bay para?”
E trahadonan ta den incentidumbre total riba kico lo pasa awor y kico lo bini pa futuro. Si yega asina leu, e pregunta tambe ta si e compania por recompensa e trahadonan cu tin decadas ta traha. Dus e compania aparentemente ta pasando den varios reto y nos lo ta pendiente pa mira si gerencia lo por brinda nos e informacion aki den un proximo cobertura.
