E siman aki Minister finansa Xiomara Maduro hunto cu Secretario di Estado di Hulanda Knops a firma a firma pa Aruba por haya un prestamo pa por cubri e pago di e debe externo den aña 2021 y 2022. Ta trata aki di un suma di 177.1 miyon pa cubri e debenan cu ta madura den aña 2021 y 346 miyon cu ta madura den aña 2022.
E debenan aki cu ta suma 523.1 miyon a acumula 10 aña pasa pa cual Aruba ta paga un interes di entre 5 pa 6%. Cu Hulanda a yega na un acuerdo cu lo refinancia e debenan aki na un interes rebaha di 2.64%. E refinanciamento aki na un interes reduci ta scapa Aruba mas o menos 82 miyon florin na gasto di interes den e proximo 7 aña. Ta bon pa remarca cu e prestamo nobo aki no ta hisa e nivel di debe di nos Pais.
Minister Xiomara Maduro ta informa cu e refinanciamento aki na interes reduci via Hulanda ta importante ya cu inversionistanan por ta garantisa cu Aruba ta keda cumpli cu su obligacion financiero den aña 2021 y 2022. E refinanciamento aki ta trece trankilidad cerca tur inversionista y compania di rating manera Standard and Poor’s y Fitch, cu ta evalua e credibilidad financiero di Aruba. Di e manera aki Gobierno ta keda traha na un manera serio pa por sigui garantisa un bon ‘standing’ pa Aruba cerca inversionistanan.
