Prome Minister, mr. Evelyn Wever-Croes, a informa cu no ta bay sigui cu e scanner di stembiljet. Esaki tabata un bon noticia pa AVP y lider di partido Mike Eman. Partido AVP tabata un di e promenan cu a sali dilanti pa bisa cu esaki no por. Awe nan a haya e rason.
Mike Eman a bisa cu pueblo Arubano ta trankil awo. E lucha cu AVP a hiba no tabata uno simplemente pasobra e partido tabatin otro opinion cu gobierno, pero esaki ta debi di a scucha y analisa e inkietud den pueblo. Segun Eman, na momento cu su persona y Gregory Bronswinkel a papia di su afiliacion na e partido, e tema di scanner tabata uno pidi p’e profundisa riba dje. Esaki ta debi cu Bronswinkel ta un experto den digitalisacion, cual el a haci esey.
Eman a haya un memo di tur riesgo grandi cu e scanner aki tin riba e parti di confiabel, secresia di voto y tambe imparcialidad. Ora di introduci digitalisacion, mester duna tur partido oportunidad pa haci un audit y bin cu experto propio. Esey ta pa mira si e mashinnan cu ta bay introduci di digitalisacion ta cumpli cu obhetividad, neutralidad y secresia di voto. Despues di a mira e memorandum di Bronswinkel, a pidie p’e mustra comunidad prome cu el a subi lista politico. Loke Bronswinkel a haci tabatin su influencia den comunidad y p’esey Eman ta gradicie pa su contribucion.
Desde e prome dia di algun aña caba, p’esey nan tabata informa gobierno. E ta haya straño actitud di cierto profesional cu ta cana mescos cu e gobierno di impone cosnan asina. E partidonan politico ta esunnan cu ta participa den e proceso electoral. AVP tin mas di 80 aña ta participa den proceso electoral y semper a respeta e resultado, segun Eman. Semper nan a kita pechi sea di a gana of perde un eleccion, unda a celebra cual nan lo haci esey dia nan gana 25 di juni. Pero nunca nan a duda den resultado di eleccion, aunke cu e tabata desapuntante.
