Diadomingo atardi a sali un delegacion diplomatico di Aruba rumbo pa nos hermana isla, Corsou. Aunke chikito, pero asina mes, cuater diplomatico riba costo di pueblo, a biaha. Ta trata aki di presidente di parlamento, mr. Edgard Vrolijk (MEP), Hendrik Tevreden (MEP), mr. Gerlien Croes (parlamentario independiente) y Griffier di Parlamento, mr. Herman Hek. Tur cuater a biaha p’e celebracion di “Dia di Bandera” na Corsou.
E ta algo masha normal, ora nos ta celebra “Dia di Himno y Bandera” na Aruba, tambe minister- y parlamentarionan di Corsou sa bin celebra cu nos riba nos dia. E biaha aki a toca turno pa nos hendenan bay celebra cu nan. Ta un muestra di hermandad entre e islanan ABC. Diadomingo nan a sali y nan ta regresa diamars atardi bek. Apart di e grupo aki cu a bay Corsou, tin un grupo di parlamentario cu lo bay Parlatino.
