Recientemente DMH conhuntamente cu Stan van Haaren di UNICEF NL a presenta e trabounan realisa pa Departamento di Mucha y Hoben den su totalidad na Comision Fiho di Enseñansa di Parlamento. Durante e presentacion DMH a presenta den linea grandi tur e trabounan haci, relaciona cu LV Kinderopvang/Centro di Cuido di Mucha, Lbham Codigo di Proteccion, como e Toolkit y revista Digital y tambe proyecto di 30 mucha pa Intervencion Trempan den Centro di Cuido di Mucha.
Mester enfatisa cu e presentacion a bay den un ambiente hopi ameno, agradabel y sigur cu hopi interes di e parlamentarionan presente, specialmente e parti di acumulacion di data y metodo di evaluacion.
Tur e trabounan aki ta duna ehecucion efectivo y eficiente di e Tratado Internacional di Derecho di Mucha, di cual Aruba, como pais, a ratifica for di 2001.
DMH ta asumi varios responsabilidad pa na un forma mas completo y holistico posibel, salvaguardia y protega e derechonan di mucha mediante di maneho nacional, aspecto huridico (ley) y acercamento profesional diferente articulo describi den e Tratado aki.
A enfatisa tambe cu actualmente tin 41 Supervisor di Codigo (SdC), cu tin un MB pa eherce e rol importante aki dentro di nan instancia y cu e focus ta pa tur instancia concerni, tin un protocol di Codigo di Proteccion pa 30 di juni, mirando cu tin algun instancia cu ta den e trayecto for di 2020 y e ley a drenta na vigor desde prome di april 2021.
Finalmente por bisa, cu comision completo a keda sorprendi y impresiona cu tur e trabounan realisa pa un grupo di profesional chikito, pero cu a demostra dedicacion, motivacion y vision pa brinda un mihor structura y maneho sostenibel y duradero pa bienestar general di nos muchanan.
