Prome Minister Wever Croes a anuncia cu e siman aki ta cuminsa haci un evaluacion con pa bay flexibilisa e maneho pa cu COVID-19, con ta bay adapta e medidanan. Esaki el a anuncia diadomingo anochi durante e resumen cu el a duna.
Prome el a papia di e siman cu ta tras di lomba durante cual a conoce 4 caso positivo na Aruba den 297 persona cu a wordo getest, pues 1%. A yega total 100 caso positivo den 1577 test haci desde principio di maart.
Ademas 25 persona a recupera e siman aki. Tin ainda 29 caso positivo, y p’esey Gobierno di Aruba ta insisti pa tur hende keda paden. “Nos ta bayendo OK, pero ainda e peliger di e virus tey. E virus ta eyfo wardando abo pa pasa busc’e y hib’e bo cas”, segun Premier Evelyn Wever-Croes.
“Normal nobo”
“Covid-19 a cambia henter nos bida y tanten cu no tin vacuna, nos mester keda cu e distanciamento social y e medidanan di higiena. Pues semper mantene e distancia di 2 meter di otro hende. Esaki no solamente na cas, pero tambe na trabou, na scol, na luganan publico.”
Entrante 28 april Gobierno ta pensa di flexibilisa e medidanan, cambia e orarionan di toque de queda, y di cierre di establecimento. Tambe kier stimula bendemento di producto on-line of via telefon y cu entrega na bo cas. Pues mientras cu tiendanan no por habri ainda, e benta por cuminsa toch.
Gobierno ta preparando un cuadro di maneho cu lo ta aplicabel pa cada sector di nos economia, di reglanan cu nan mester mantene na dje.
E mandatario a splica cu durante dos siman lo evalua con e situacion ta cu e adaptacion haci, con e hendenan ta comporta nan mes, pero tambe con e virus ta comporta su mes. A base di esey lo mira ki otro pasonan mas lo tuma.
Pues probablemente awe nochi lo tin mas informacion riba con ta bay adapta e medidanan
