Diabierna atardi a tuma luga na Cristal Theatre Aruba, e “weigh and faceoff” na caminda pa e competencia di MMA, organisa pa Victory Extreme Figthing Championship (VXFC). Jerall Maduro, miembro di e organisacion, a indica cu e evento ta priminti di bira uno hopi importante pa e mundo di MMA na Aruba. E “weigh and faceoff” a tuma luga den un sala completamente yen y nan ta sigur gradicido na e pueblo cu a sa di respalda e evento aki, den su totalidad.
E atraccion principal ta ora cu Johan ‘Duende’ Croes lo topa cu Joziro ‘The Bull” Boye y directamente for di Republica Dominicana, Carlos ‘El Matador’ Matos cu lo bay topa cu e futuro di Aruba, Damian ‘Babayaca’ Pinas.
Sin e patrocinadonan e evento aki lo no tabata posibel y semper Balashi t’ey manera ‘Bolo preto na bruid’. Un otro patrocinado ta Monster Energy Drink, cu a join partner hunto cu Victory Extreme Figthing Championship (VXFC). Monster ta e bebida di UFC tambe, cual ta haci e organisacion orguyoso di ta forma parti di un partnership cu nan.
Como mensahe final, Jerall a bisa cu como organisacion nan ta para pa nivel y ta exigi di e atletanan, pa cual e biaha aki nan ta exigi, como organisado, na tur esunnan cu ta bin wak e peleanan, respet y bon comportacion n’e evento aki.
E anochi aki nan lo tin hopi bishitante di exterior y hopi bringado cu tin oportunidadnan grandi. Esaki ta haci tambe cu, pa prome biaha nan Aruba, nan a saca un ‘Rules and Regulations’. Si un persona no comporta su mes den e evento, e lo por wordo expulsa for di e evento aki.
Tambe maduro a recorda tur hende cu e evento aki, ta un evento deportivo. Y esun cu ta bin e evento, ta pasobra cu nan ta apoya e atletanan. Ta haci apelacion na un y tur, ban comporta na un manera civico y disfruta di un gran evento. Tin hopi plan pa hiba e evento aki mas aleu di Aruba su fronteranan.
Un y tur ta keda cordialmente invita pa bin apoya e evento aki den Aruba Entertainment Center.
