Despues di tur e turbulencia cu Post Aruba ta pasando aden, den curso di mainta e trahadonan di e empresa aki a haya un memo den cual ta informa nan cu e director a bay cas. Ta trata aki di Guillermo Raymond.
Den e memo cu e empleadonan a haya no ta menciona si el a tuma su retiro, nan a mand’e cas of ta su tempo pa baha cu pensioen. E unico cos cu a menciona ta cu desde diabierna, 21 di juni, 2024, Raymond lo no fungi mas como director di Post Aruba N.V. “Nos ta sumamente agradecido na Señor Raymond pa su dedicacion y trabou duro durante di su 40 aña di servicio na Post Aruba.”
Na mesun momento a informa e empleadonan cu ta introduci dos director interino, kendenan lo asumi un rol crucial durante e temporada di transicion aki. Ta trata di Ramoncito Croes y Ester Gomes. “Nos ta confia cu sr. Croes y sra. Gomes lo duna guia y direccion necesario pa mantene e operacion di Post Aruba N.V. den un manera eficiente y coherente.”
Ta trata di un memo manda door di Hunta di Comisario di e empresa.
Post Aruba ta den problema serio y ta perdiendo placa pa algun aña caba. Ta depende di Gobierno y ta danki na Gobierno cu no a bati bancarota ainda. Miyones mester hinca den e empresa, cu su entradanan no ta yega pa paga e mas di 100 personanan cu tin den servicio. Post ta den Corte contra e CAO di su empleadonan, pasobra no tin forma pa cumpli.
Recientemente Contraloria General a publica un rapport unda cu a investiga empresanan di gobierno poni na un distancia. Y Post Aruba ta un di nan y e conclusion tabata desastroso pa nan. Metemento politico ta hunga un rol cu empresanan estatal no ta funciona manera debe ser, segun a bisa den e rapport “Op afstand maar toch dichtbij”.
