Diahuebs e delegacion di Eerste Kamer a reuni cu diferente lidernan religioso riba pobresa y tambe matrimonio di mesun sexo. Miembro di Eerste Kamer, mr. Jeroen Recourt (GroenLinks-PvdA) a indica cu e delegacion ta na Aruba pa reuni riba diferente topiconan, di cual tin dos masha importante: Combati pobresa y matrimonio di mesun sexo.
E organisacionnan religioso ta forma parti di e comunidad Arubano y e comunidad ta balora e opinion di e lidernan religioso. E pregunta a bin dilanti di kico lo pasa si Corte Superior indica cu mester introduci matrimonio civil entre dos persona di mesun sexo. Con e lidernan religioso lo reacciona riba un sentencia asina?
Recourt a indica cu nan a reuni cu e lidernan religioso hudiu y islamico. Nan ta di opinion cu nan ta respeta e derecho civil, pero no lo acepta un matrimonio religioso den nan misa/tempel. E rabbi a cita pasashinan di bijbel, unda el a enfatisa cu loke ta di Cesar ta di Cesar y loke ta di Dios ta di Dios.
Por ultimo, mr. Jeroen Recourt a subraya cu e reunion di diahuebs no tin niun influencia riba e decision cu Corte Superior lo mester tuma pa loke ta regarda matrimonio di mesun sexo.
Dominee Jan Rinzema, lider religioso di e comunidad protestant y ta predica tanto n’e Kerki Protestant na Playa como tambe den Seroe Colorado.
Dominee Rinzema tambe tabata un di e religiosonan cu a reuni cu e delegacion di Senado Hulandes (Eerste Kamer). E delegacion tabata consisti di diesshete miembro, cu nan tin cartera tin algo di Caribe Hulandes. Pa hopi di nan, esaki tabata nan prome bishita nos isla y nan tabata kier sa kico ta sinti di ta biba na Aruba.
A comparti e historia di Aruba cu e delegacion, e conexion cu Hulanda, tocante situacion di pobresa, e proximo sentencia tocante matrimonio di mesun sexo riba nos isla y e importancia di Iglesia como un organisacion di union den comunidad.
Ausente den e reunionnan aki tabata e representante di Iglesianan Cristian di Aruba (ICA).
