Despues cu a suavisa e medidanan relaciona cu COVID-19, diabierna anochi tabata un dia hopi druk pa Cuerpo Policial. A activa diferente team riba caya pa asina mantene orden publico.
Lito Lacle, vocero policial a comenta cu mando policial a dicidi desde diabierna cu lo pone extra refuerso den tur districto di Aruba pa asina haci extra control, no solamente pa evento di Spula Krijt, pero tambe e crimennan cu a tuma luga y e cantidad di arma di candela cu probablemente lo ta riba caya.
E control tabata mas parti preventivo. Pero e parti preventivo a resulta despues mas tanto e parti represivo, mirando cuanto asistencia polis tabatin riba caya den diferente districto.
Na San Nicolas tabatin diferente detencion, como tambe na Playa, Noord. Tambe tabatin detencion pa esunnan cu a core bao influencia di alcohol.
CAS CASUELA Y BLUE MOON
Lacle a remarca riba e hecho na Cas Casuela y Blue Moon. Ta dos luga cu polis tabatin problema cu bringamento. E caso di Blue Moon pa mas of menos 2:00 am polis a bay eynan pa bringamento. Eynan a constata cu un grupo di persona lo mester tabata maltratando entre otro e security di e luga, mustrando asina aki un mal comportacion di parti di e grupo aki.
Mesora a purba di intermedia y aki a cuminsa cu un bringamento entre e personanan envolvi cu e agentenan di polis, unda cu un di nan a keda malamente herida.
E polis ta den hospital actualmente. Probablemente e mester a scheur su cash’i wowo. E investigacion ta sigui. Esun cu a comete esaki ta deteni. Pero mirando cu mas hende a bringa, posibilidad ta cu lo tin mas detencion.
Ta hopi importante pa pueblo sa di comporta su mes manera mester ta. E actuacion di cierto personanan den publico, no ta sirbi como motivacion pa nos haya turista bek. E comportacion di pueblo di Aruba ta hopi importante den e caso aki.
P’esey ta importante cu ora polis pidi pa bandona e sitio, haci caso di polis. Si no ta comporta manera mester ta, e situacion ta escala. Tarea di polis ta pa neutralisa tur cos. Sigui ordo di polis y bandona e sitio, manera ya menciona.
Polis t’ey pa tene e poblacion safe. Tarea di publico ta pa gosa loke ta haciendo, pero e obligacion ta pa comporta manera debe ser.
Pa cobertura mas amplio, lesa e edicion di TREMPAN.
