Diamars merdia, alrededor di 12:30 pm, polis a presenta cu urgencia dilanti EPB Hato p’un supuesto pelea. Na nan yegada ya e bringadonan a bandona sitio caba. Pero testigo a duna informacion clave ken e bringadonan tabata.
No un y tampoco dos sino como tres pa cuater patruya di polis incluyendo motor unit a activa pa busca e bringadonan. No mucho rato despues, a topa cu e bringadonan den un auto marca Nissan modelo Versa color shinishi den bisendario. Entre e trio, tabatin un hende muhe tambe. A boei nan y bay cu nan direccion di warda di polis caminda lo presenta nan dilanti un subfiscal kende lo dicidi sea riba nan encarcelacion of libertad.
Bringamento riba caminda publico no ta permito, pio ainda dilanti un scol caminda t’un centro di educacion. Ta parce cu no ta tur hoben ta bay scol pa siña pero ta bay pa busca problema y tira sla. No ta prome biaha cu polis ta presenta na boshi pa atende cu pelea dilanti EPB Hato, claro, directiva di scol no tin nada di haber.
