Awe tardi pa 6:20pm un patruya di Polis, cu a atende un asistencia, a haya su mes envolvi den un accidente estilo “su so cu su so”. E aut’i polis D-290 a reverse diripiente, sin tene cuenta cu tin un pal’i luz su tras. E pal’i luz di su banda tambe kier a mustra cu t’e tin preferencia riba e caminda ey y no a hala pa autoridad.
E auto a dal den dje. Polis di trafico a presenta pa traha rapport riba e susedido. E polis a splica su colega cu e “backup sensor” no a funciona, pues no a pita pa avisa cu tin algo su tras.
Ta conoci cu autonan di Polis no tin seguro, por lo menos no “all risk”. Autonan di gobierno general tin seguro “tercera parti” cu ta cubri e otro auto so. Den pasado mando policial tabata cobra e polis chauffeur mes ora di un accidente y cu e ta culpabel.
No ta conoci si ainda e regla ey ta vigente of ta for di caha di gobierno mes lo paga e daño cometi.
Mester bisa si cu e daño na e vehiculo ta limita. Elmar lo mester laga sa si e pal’i luz lo por a sufri daño, pa cual kisas lo tin cu reemplas’e.
