Luna di maart no a pasa sin mas pa e fundacion encarga cu e celebracion di polis pensiona. E bishita agradabel aki a bira un expectativa grandi cerca cada ex-colega riba nan fecha natal. E ta masha aprecia cerca tur cu a scucha zonido di sirena di sorpresa dilanti nan cas.
Cada un bishita di sorpresa ta trece alegria, algun lagrima y hopi recuerdo cerca ex-polis na momento cu Fundacion Balora Polisnan Pensiona presenta y dedica un rato na cada pensionado cu a laga e cuerpo di polis debi na pensioen, pero cu den nan mente y curason…keto bay nan ta polis!
Cu masha emocion ta comparti un brindis, pasapalo cerca algun y combersa un rato di e bon tempo cu nan a pasa hunto den servicio di Cuerpo Policial Aruba. Cada famia ta prepara segun cu nan por, pero cada bishita ta bin di curason cerca e grupo cu ta presenta e dia ey.
E luna di maart no a pasa voorbij sin e felicitacion, reencuentro, bon deseo y presencia di colega cerca nan ex-colega polis. E cantamento di ‘happy birthday’ no por a falta pero mas ainda e sonrisa riba cara di cada un cu ta habri porta di cas pa e ‘agasajo’ aki.
Den caravana ta yega hunto cu un gesto y dedicatorio cu ainda, mescos cu semper, nan ta aprecia tur nan aña di servicio, nan amistad y tur locual cu nan ta nifica pa Cuerpo Policial di Aruba.
Den e final di luna di februari como tambe den luna di maart, a conta cu ocho pensionado cu a celebra nan cumpleaño y a ricibi un cariño special for di e fundacion. Entre nan tin dia 28 di februari, ex- hefe di departamento di trafico y experto den trafico, Ricardo Muller. Riba e fecha aki a yega hunto den un celebracion mas priva den forma di un cena pa asina combersa y pasa un rato ameno pa comparti cu ne riba su dia.
Dia 2 di maart diferente colega a pasa bishita ex-specialista di trafico, Clyde Orman riba su fecha natal. Un momento agradabel den compania di su famia y colega cu a bin celebra cu ne. A sigui den e luna cu mas cumpleañero, dia 7 di maart, Fundacion Balorando Polis Pensionado hunto cu algun colega a yega di sorpresa na cas di ex-colega di Centrale Post, Benny Bikker, pa dun’e pabien ariba su cumpleaño. Den un ambiente alegre a canta y desea Benny lo miho ariba su dia.
Dia 11 di maart, manera bolo preto na bruid a yega cerca un otro colega pensiona. A pasa felicita ex-specialista forensico, Marvin Peterson, cu sigur a keda masha contento cu e bishita. E cantamento cu e bon deseo nan no por a keda afo. E dia siguiente, esta 12 di maart, den ora nan di mainta a pasa di bishita cerca colega pensiona, ex-colega di e departamento di rijbewijs, Peter Simmons cu a cumpli un aña mas di bida. Masha cos di conta ta locual cu tin semper y ta cu masha gusto ta haci e bishita sorpresanan aki.
E siman despues, dia 23 di maart, cu e zonido conoci di e sirena y cu e ambiente di nos coleganan y colega nan pensiona, a yega pa sorpresa e colega stima Libiee ariba su fecha natal. Manera ta e tradicion, a canta p’e y desea su persona hopi aña mas di bida y salud. A sigui pa dia 30 di maart 2023, caminda cu a yega cerca ex-experto di tiro, Dichi Croes. A pasa yama Dichi pabien ariba su fecha natal. Pa cera e luna di maart, dia 31 di maart, a haci esaki den celebracion cu colega pensiona, ex-recherche Josef Dirksz. Fundacion Balorando Polis Pensionado, e coleganan y colega esunnan pensiona a pasa duna pabien, canta y desea Josef tur cos bon riba su fecha natal.
Tocante Fundacion Balorando Polis Pensionado
Un grupo di polis a bini hunto pa forma e Fundacion Balorando Polis Pensionado. A lanta e fundacion pa honra e polisnan cu ta of ta bay bira pensionado. E fundacion ta 100% independiente di Cuerpo Policial di Aruba y ta non-profit foundation.
Emiliano Baarh, presidente Fundacion Balorando Polis Pensionado, a splica den su casi trinta aña di servicio, el a mira hopi di su coleganan cu awe ta pensionado y tin un aprecio pa nan. El a haya e idea di forma un fundacion pa duna y mustra e aprecio p’e grupo ey. El a papia di e articulo Cosecha c’un colega a yega di skirbi, cual den e articulo aki a papia di e status cu Aruba a haya di Antias Hulandes y esunnan cu a bay of bin bek. A papia riba e hecho esunnan cu a keda a wanta e forti y sigui draai normal, di a sembra e simia p’e Cuerpo Policial y asina e ta unda e ta awe.
Baarh a gradici nan pa loke nan ta haciendo ainda pa Cuerpo. Tambe el a indica di bisa ‘ta’ pa motibo cu ainda sa acerca e pensionadonan pa conseho. E presidente dje fundacion a papia riba e parti di dedicacion, sacrificio y experencia di e pensionadonan ta algo di aprecia y balora. Cu e pensamento ey a acerca algun colega pa mira na ki forma por honra esunnan cu a of ta bay baha cu pensioen. P’esey a bin cu Fundacion Balorando Polis Pensionado cu ta uno non-profit y no ta forma parti di Cuerpo Policial.
E fundacion ta consisti pa Emiliano Baarh como presidente, Ansushka Harms como tesorero, Ludy-June Wix como secretario y como miembro di directive ta conta cu sosten di Roberto Brown, Pedro de Verona Kock, Annette Patterson, Jamal Courtar, Zulaica Mitchell y Beverly Akins. E miembronan cu ta forma parti ta haci esaki den nan tempo liber como boluntario. Nan meta principal ta pa reconoce e polis cu a baha pensioen, pa reconoce nan ora di haci aña of ofrece un atencion den caso si bira malo.
