Diabierna den ora di marduga, rond di 1:30, Bomberonan a bay na un cas na “Caya Sint Eustatius” na San Nicolas cu tabata na candela. Pero ora cu tur autoridadnan a yega na e sitio a constata cu no tabata un cas, sino un mata pega cu e cas tabata na candela, pero alabes menasando di yega na e cas.
E agentenan Policial a wak e seriedad di e candela y a pidi pa Brandweer bin cu maximo spoed pa asina evita e candela ta yega na e cas tambe. Polis a realisa cu si mester warda riba Brandweer, cu e candela mientrastanto por yega na e cas y asina bira hopi mas grandi. Aki e Polis no a perde pa gana y a tuma e inicativa den nan mesun man y conhuntamente cu bisiña a cuminsa paga e candela cu hemchi di awa, slang y hasta e brandblusser cu Polis tin den nan auto.
Nan esfuerso a duna resultado y a logra di paga e candela net promer cu Bombero a yega.Den e proceso di paga e candela, ambos agente policial a inhala basta huma y por a tuma nota cu esaki a cuminsa afectanan, unda a keda tosa y tabata tin dificultad pa hala rosea. A yama Ambulance pa asina e dos Polisnan haya tratamento medico.
No ta conoci si nan tabata apto pa sigui traha of si a manda nan cas.Un bon trabou di Polis cu a demonstra awe atrobe cu hopi biaha Polis ta stima nan trabou y ta bay e extra mile pa garantisa e siguridad di comunidad di Aruba.E causa di e candela mes no ta conoci.
Segun informe e candela a cuminsa na e mata y locual por a wak, ta colchon, stoel y otro material a cuminsa kima te cu e vlamnan a cuminsa mancha e cas. Segun por a compronde, a notifica Elmar tambe ya cu e candela a yega basta cerca di e cashi di coriente. Un incidente cu por a caba desastroso den oranan di marduga y cu por a pega mas cas na candela, pero cu a caba hopi bon, danki na e actuacion rapido di Polis conhuntamente cu algun bisiña. Di parti 24ora un pronto recuperacion pa e dos agentenan.
