Diaranson mainta pa mas o menos 11:58 am a manda un patruya di polis urgente dilanti di Shun Lin Supermarket na Angochi pa un hoben cu a yega ey cu un hinca na curpa. E hoben (masculino) cu hinca na su curpa tabata mustra grave.
Di biaha a pidi pa ambulance y asina transporte pa hospital pa por ricibi asistencia medico avansa. Recherche a presenta na e sitio como tambe polis tecnico pa asina cuminsa cu e investigacion.
Un rato despues a drenta e notificacion cu a detene e mucha di inicia R.I. miho conoci como Trevor como sospechoso di e caso di hincamento, biba na Coba Lodo. Ta un mucha di apenas 15 aña di edad. Informacion cu nos ta dispone di dje ta indica cu e victima tambe ta un menor di edad.
E mucha aki awo, ta confronta un acusacion hopi serio, pasobra ta papia aki di intento di asesinato. A deten’e na altura di Sport Boys, na Santa Cruz. A envolvi Jeugd en Zeden Politie den e caso pa atende cu e sospechoso specifico aki.
