Diasabra anochi pa mas of menos 10:00pm, un patruya di polis a topa cu un “Fake Police” canando riba strip di hotelnan highrise. Mesora a deten’e pa por saca afo di unda el a haya e uniform, cu ta pertenece na Gobierno di Aruba.
Ta sali for di e punto di bista cu e uniform ta “horta”, pues di pronto e celebracion di Halloween a caba pa e homber aki, cu a hay’e dilanti un Sub Fiscal.
Disfrasa na polis ta masha normal den e tipo di fiestanan asina durante e ultimo añanan. Asina tambe hopi sa disfrasa na nurse y tin biaha hasta na pastoor. Mayoria biaha ta bisti un paña cu mesora por mira cu ta un disfras.
Den e caso aki e homber a bisti un poloshirt cu ta bisa POLIS cu ta solamente un polis di berdad por tin. Awor e lo tin cu duna cuenta for di unda el a cumpra e “disfras” aki.
