Cu bista riba aña 2024, Oficina di Turismo A.T.A. a organisa su Global Marketing Meeting cu a tuma luga di 13 pa 15 di juni. E reunion aki a conta cu participacion di miembronan di ekipo di A.T.A. di Norte America, Latino America, Europa y Aruba.
E Global Marketing Meeting ta un reunion cu ta tuma luga anualmente y ta fungi como e fundeshi p’e Plan Corporativo y cu esey metanan di A.T.A., y pues pa Aruba su turismo, p’e siguiente aña.
E obhetivo di e reunion ta pa concretisa e direccion strategico, traha un presupuesto y determina e resultadonan desea pa aña 2024. A.T.A. ta uza e sesion pa update metanan cu ta defini como parti di su plan multi-anual y ta fiha meta nobo.
Durante e prome dia di reunion, a dedica tempo y atencion n’e posicion di Aruba, tanto for di punto di bista di ‘branding’ como tambe producto turistico. A evalua oportunidadnan existente pa fortifica conocemento, posicionamento y percepcion di Aruba. Tambe a toca tema manera inventario di camber di hotel, otro tipo di acomodacion, tendencia den mercado turistico, desaroyo riba nos isla, como tambe den e area di Caribe y n’e paisnan competidor.
E directornan di cada area a duna un presentacion tocante e perspectiva pa 2023 y a presenta nan metanan pa cada mercado pa aña 2024. Esakinan ta basa entre otro riba e cantidad di vuelo y asiento disponibel, factor interno y externo, strategia di diversificacion y costo di adkisicion. Tambe a indica si tin mercado nobo pa acerca y fondo necesario pa logra esaki.
Durante e di dos dia di reunion a pone enfasis riba e tema di ‘niche marketing’ pa aña 2024. Niche marketing t’e concepto di promociona y bende producto of servicio existente cu ta satisface necesidad specifico. Ya pa algun aña caba, Aruba ta pone enfoke specifico den e areanan di boda, salud y bienestar, cultura, gastronomia, naturalesa y turismo eco-consciente. Pa medio di diferente ehercicio, a bin cu idea nobo con pa incorpora e vision di niche marketing den e strategia di comunicacion pa aña 2024.
Pa toca riba e temanan riba menciona a conta cu presentacion di Gilliany Oduber di Ritz Carlton Aruba, Edjean Semeleer di Go Cultura Foundation, Renwick Heronimo di Fundacion Museo Arubano, Gea Sougé di Gea Sougé Nature & Life Coaching, Kimberly Rooijakkers di Boardwalk Boutique Hotel Aruba, Urvin Croes di Infini Aruba y tambe Tyson Lopez y Edeline Berg di Fundacion Parke Nacional Aruba.
E di tres dia di reunion a trata e tema di canal di distribucion y a evalua dato colecta p’asina por yega n’e ‘global lead generation strategy’ – esta e meta pa genera mas interes y ‘leads’ cerca posibel bishitante. Cu esaki por sigui traha riba e ‘roadmap’ y plan di mercadeo digital pa 2024, cu tambe lo forma parti di e Plan Corporativo hunto cu su presupuesto.
Finalmente a establece asina yama ‘key performance indicators’ (KPIs) cu t’e indicadornan cu lo midi e exito di cada iniciativa y esfuerso. Esaki ta ya caba integral den locual A.T.A. ta haci, pero a revisa esakinan.
E miembronan di ekipo di A.T.A. a participa cu entusiasmo durante e sesionnan di e Global Marketing Meeting y ta comprometi pa traha hunto y realisa e vision pa futuro.
Na final di dia, e trabou di A.T.A. no ta solamente pa promove e producto turistico, sino tambe pa crea experiencia inolvidabel sigurando crecemento duradero pa Aruba, di manera sostenibel.
![](https://24ora.com/wp-content/uploads/2023/06/ATA-Global-Meetings-2023-6.jpeg)
![](https://24ora.com/wp-content/uploads/2023/06/ATA-Global-Meetings-2023-5-1544x1440.jpg)
![](https://24ora.com/wp-content/uploads/2023/06/ATA-Global-Meetings-2023-3-1920x1280.jpg)
![](https://24ora.com/wp-content/uploads/2023/06/ATA-Global-Meetings-2023-4-1920x1325.jpg)
![](https://24ora.com/wp-content/uploads/2023/06/ATA-Global-Meetings-2023-2-1920x1146.jpg)
![](https://24ora.com/wp-content/uploads/2023/06/ATA-Global-Meetings-2023-1-1920x1280.jpg)