Piscadonan di Rancho y Stichting Rancho a yega na un acuerdo cu Poundwise Investment, desaroyadonan di Harbour House Project.
Manera por corda ultimo lunanan a sinta varios biaha na mesa pa dialoga y awe a logra na un acuerdo acepta door di e piscadonan. E ta un acuerdo satisfecho pa tur partido, esaki ta loke e director di Aruba Ports Authority (APA), Marc Figaroa, a trece dilanti. Den e acuerdo a keda acorda cu ta traha pa preserva e parti cultural di Aruba. Esnan cu a sinta na mesa tabata delegacion di piscadonan consistiendo di sr. Dania, Libie, Andrade y Clifford Rosa di Stichting Rancho, hunto cu sres Ecury, Albertus y Poundwise.
Di parti di Poundwise, a hiba palabra Alberto Perret Gentil, kende a splica cu nan ta contento cu e acuerdo. Nan tin 20 aña caba trahando na Aruba y ta spera cu e acuerdo ta inicio di un otro etapa di aliansa di cooperacion.
Palabranan similar a bini di Clifford Rosa y Joseph Ecury du Stichting Rancho, kende a gradici pa e atencion poni na e aspecto di conservacion di cultura, historia y tradicion. Lo sigui observa e desaroyo di cerca y cu ta cumpli cu loke a palabra. E ta kere cu e acuerdo lo yuda na mehoracion di henter e area.
Nelson Andrade, vocero di Waf’e Rancho, a cuminsa pa splica kico tabata e problema pa e piscadonan y e motibo pakico a haya nan mes obliga di laga nan bos resona. Pero a logra haya oido di tur e partidonan envolvi cu a haci cu e partidonan a bini hunto na mesa. A logra haya espacio pa 12 piscado y e pasada necesario pa e pueblo. E area ta keda habri pa famia sinta pisca den oranan di atardi na Waf’i Rancho. A enfatisa cu ta kere den embeyecimento y desaroyo di e area.
Awo na e pier lo pone conexion di awa y coriente cu ta sali na beneficio di e piscadonan cu ta haci uzo di e area aki pa mara nan boto. “E pier ta importante pa e piscadonan. Ta gradici tur esnan cu a contribui y a pone nan firma.”
Edwin Dania, representante di piscadonan di Waf’e Rancho , tabatin palabranan di gradicimento pa tur esnan cu a pone di nan banda pa yega na e acuerdo cu a trece “basta logro”. Asina door di sinta na mesa durante un luna a yega na e logro aki. “Tur partido ta di acuerdo pa sigui na mesa y finalisa e ultimo detayenan. Danki Poundwise pa scucha nos y tambe na director di APA.”
