Tempo nos tabata mucha cu ta bay scol, pidi despensa ta nifica un echo di cobardia of bo tin miedo. Pero awor cu nos a bira hende grandi nos ta mira cu den pidimento di despensa nos ta expresa respet y humildad cual ta un parti di etica cu mundo ta perdiendo.
Ora bo pidi hende despensa ta nifica cu bo no kier tin ningun clase di enemistad cu hende, bo kier pa hende tin pas mescos cu abo tin pas. Pero esey no ta nifica cu bo ta apoya su pensamento of forma di bida.
Pasobra ta para skirbi den e buki di Hebreonan 12:14: Aspira pa tin pas cu tur hende y santificacion, sin cual ningun hende lo no mira Señor.
Den Mateo capitulo 13 Hesus ta duna e splicacion di e yerba shimaron y e maishi.
Hesus ta e sembrado, e cunucu ta e mundo, e bon simia ta e yiunan di e reino, y e yerba shimaron ta e yiunan di e malvado, e enemigo cu a sembra nan ta e diabel y e cosecha ta e fin di mundo. Y e cosechadonan ta e angelnan.
Tur esaki ta locual Hesus a bisa y den tur Bijbel e ta skirbi mes un cos. Esaki ta e berdad y punto.
Awor tambe ta para skirbi cu esunnan cu ta traha den e cunucu a bay bisa e doño di cunucu:
• Hefe no ta bon simia bo a planta ta dicon nos ta mira yerba shimaron ta crece meymey di maishi.
• E Hefe a contesta, ta e enemigo a haci esaki, e trahadonan a bisa nan Hefe , bo kier pa nos bay y recoge nan.
• E Hefe a bisa no, pa no sosode cu mientras boso ta recoge e yerba shimaron, boso ranca tambe e maishi hunto cu ne. Den un palabra bisa e trabao ey lag’e pa Mi,
• Y Hesus a bisa laga tur dos crece hunto te na tempo di cosecha, y lo mi bisa e cosechadonan, recoge e yerba shimaron prome y mara nan na boshi, pa kima nan, ma recoge e trigo warda den mi mangasina.
Awor tin algo cu hopi hende no sa: Hesus a bisa: Esun cu nenga mi dilanti di hende,esey Mi tambe lo nenga dilanti di Mi Tata cu ta den cielo (Mateo 10:32-33).
Pasobra ta para skirbi cu Dios a stima mundo asina tanto cu e a manda su Yiu unigenito pa ken cu kere den dje no bay perdi ma tin bida eterna , esun cu kere lo ta salba y esun cu no kere lo ta condena.
Si bo puntra ki clase di condena, lamentablemente nos tin cu bisa cu e condena ey ta fierno, si bo no arepenti y kere den e Yiu unigenito di Dios (Juan 3:16-18).
E diabel kier pa hende kere cu esaki no ta berdad, pa asina hende sigui biba den nan mundo di pica, inmoralidad y pasion bergonsoso cu ta e caminda pa fierno (Galationan 5:19-21).
Awor nos tur tin di compronde cu den e mundo aki tin dos tipo di hende, esunnan cu kier Cristo Hesus y esunnan cu ta rechasa Cristo Hesus, pero mientras cu Cristo Hesus no bini bek ,nos tin e tarea di haci oracion y predica nan, pa nan haya oportunidad pa converti na Cristo.
Pasobra Dios den su misericordia no kier pa ningun bay perdi, pero pa tur bini na arepentimento (2 Pedro 3:8-14). E temor di Señor ta instruccion pa sabiduria,y prome cu honor ta bini humildad (Proverbionan 15:33).
Sinceramente,
Pastoor Marcel Balootje.
