Un grupo basta grandi di miembro di Israel United in Christ tabata di bishita riba nos isla via barco crucero. Informacion cu a ricibi ta cu nan a bin di bishita tanto na nos isla, como tambe nos isla ruman Corsou. Cada un pa un solo dia.
E delegacion di Israel United in Christ a yega Aruba riba barco, p’asina trece e mensahe di Cristo na nos isla. Nan a pasa na diferente media, entre otro na 24ora.com tambe p’asina trece nan concepto dilanti. Por a ripara cu na San Nicolas nan a marcha den un grupo basta grandi, na un manera ordena p’asina conscientisa tur cu nan a topa di e mensahe di Dios.
A pidi permiso via un miembro di cuerpo policial aki mes na Aruba, pa asina por aglomera na algun punto strategico den San Nicolas y asina parti flyer cu mensahe di nan religion y meta. Locual no tabata inclui den e permiso ta un marcha riba caminda/ den e cayanan di San Nicolas.
Ta kere cu mas sigur ta trata di un mal comprondemento di locual cu tabata permiti den e permiso cu a otorga e grupo. A bay atende cu nan riba e echo cu nan a subi caya den fila y marcha y sin problema algun nan a compronde e situacion y a tene na regla.
Locual cu sigur tabata un di e preocupacionnan tabata cu nan lo a pone nan mes y otro den trafico na peliger mirando cu nan tabata riba nan mes, sin ningun guia policial.
Na ningun momento e grupo lo a causa disturbio ni alteracion cu ningun hende y despues di e bishita riba nos isla a subi barco pa sigui na e siguiente isla na turno, cu tabata Corsou. Aki tambe tur cos a cana bon, te caminda cu nos ta informa.
