Durante conferencia di prensa a anuncia aumento di prijs di gas uzo domestico. E boter di gas di 100 LBS ta costa 46.78, pero awo esaki ta bira 60 florin entrante dia 15 di november. A tuma e decision cu cada kwartaal ta ahusta e prijs segun prijs di importacion.
Paul Arends, director di Arugas, a splica cu na comienso di aña nan a acudi na gobierno pa revisa structura di prijs. Esaki tabata pasobra e aumento continuo di prijs riba mercado internacional ta surpasa e prijs actual cu Arugas ta cobra aki. E prijs no ta sostenibel mas pa nan. Gas pa cushina, cu ta conoci den lenguahe comercial LPG, ta deriva di petroleo y ta bendi riba mercado internacional como materia prima.
E prijs riba mercado internacional ta fluctua y esaki ta depende di diferente factor di demanda y oferta. Incluso e tin di haber cu temporada di aña, clima y situacion geopolitico. El a splica cu den luna friu tin mas demanda di gas compara cu luna calor. Esey ta pone cu e prijs riba mercado ta subi. Segun Arends, Aruba no tin LPG como materia prima y ta import’e riba mercado internacional.
PERDIDA PA ARUGAS
Prijs di 46.78 cu ta paga pa un cilinder di 100 liber, ta bou dje prijs di importacion. Esaki ta un perdida riba cada cilinder cu Arugas ta absorbando. Parti di e perdida ta cubri p’un subsidio, pero esaki no ta suficiente pa cubri tur gasto di importacion y operacion. Pa mas di diesseis anja no a ahusta prijs di un cilinder y tabata necesario hacie.
REVISA PRIJS
Cada kwartaal nan ta revisa e prijs y a cuminsa haci esey desde awo. Ta haci ahuste a base dje prijs di importacion. Segun e director di Arugas, esey ta hacie den operacion, cu protocol estableci hunto cu Departamento di Economia, e prijs lo ta ahusta cada kwartaal.
Pa mas lesa TREMPAN.COM.
