Efesios 4:15 Ta bisa asina aki: Ma papiando e berdad den amor , nos tin di crece den tur aspekto den Dje kende ta e cabes esta Cristo.Mi a hanja palabra hopi anja pasa cu ta bisa florece caminda bo wordo planta, esey ta nifica na unda cu bo bay trata di duna un bon aporte na e lugar cu bo ta.
Awe Diarazon 8 di July mi tabata den ayuno y oracion, y puntrando Dios ki aporte mi por duna den e situacion, cu especialmente Aruba, Curacao y St Maarten ta encontra actualmente, pasobra for di tur fout bo por siña y ningun hende no ta perfecto. Mi tin hopi FE den Dios, PASOBRA DIOS TA TODOPODEROSO. E sitiuacion ta dificil pero no imposibel,locual Dios a pone riba mi curazon ta lo siguiente, y mi tin curashi di publica esaki pasobra mi sa cu tin hende cu ta bay beneficia di dje, no ta importami ta ken pasobra orguyo y egoismo no ta forma parti di mi curazon.
Mi a tende mescos cu tur hende a tende tocante un BTW di 12,5% y tambe retiro pa 1500 empleado di gobierno y mas medidanan. Na prome lugar tur cos lo aumenta, pero e entrada den caha di gobierno lo ta grandi ora comercio y turismo lanta bek y nos mester haci cosnan corecto, pasobra pa Dios nada ta imposibel. Ora nos ta papia di baha hende for di trabao nos mester pensa den ofrece pakete lucrativo cu ta duna hende speransa berdadero cu tur cos no a caba pa nan. Mi no a consulta cu ningun politico pasobra mi no tin interes politico na pecho ma bienestar di nos islanan. Si ta posibel ofrece cada hende cu tin cu baha for di nan trabao den gobierno y bay cas, no solamente rebaho den belasting, pero laga nos ofrece aandeel den Setar, Web of Elmar pa asina nan por tin un entrada tur aña for di e ganashi di e tres grandinan aki, cual casi nunca ta reporta Perdida. Tambe por ofrece nan aandeel den A.T.A ya cu e bolo turistico ta grandi y ta yega tempo pa e Arubiano e homber chikito tambe purba su sabor.
Tambe por ofrece aan deel den R.D.A. pa asina e persona cu ta baha como ambtenaar por mira un futuro den su inversionnan y e a inverti den Aruba. Y tin mas compania cu por bende aandeel cu local. Hasta si ta posibel por aserca Schiphol Group, pa hende local of grupo local por cumpra aandeel. Den agricultura mester stimula hende pa sembra di berdad y no bira cunukero temporal , pero bira un pilar di entrada y trabao pa hopi hende. Mester bini un incentive cu ta pone hende sembra, cual ta un cual ta establece cu 25 % di berdura mester wordo produci y cumpra local mente.E cunukero lo no paga inkomstenbelasting , pa asina e preis di producto local keda competitivo. Tur agricultor cu kier ta den e bolo aki mester tuma hende na trabao y cumpli cu loonbelasting , AZV y SVB. Habri porta pa mas Chickenfarm local, duna proteccion na tur hende cu ta cria cabrito, carne , porco y baca, kita invoerechten riba importacion pa cuminda di bestia, ofrece agricultornan y criadonan di bestia, un preis reduci di awa y coriente pa nan negoshi. Laga nos grandinan splika e Tesoro di cria bestia.
Pa trece mas trabao di construccion, lo ta hopi bon pa banco mescos cu ta duna fiansa na un porciento rebaha pa cumpra auto, haci mes un cos pa tur esnan cu kier traha nan cura di cas, pasobra miles di cas na Aruba no tin cura di cas, y esey tambe ta un motibo cu tin hopi cacho riba caya. Pero tur esaki lo sosode bao di control severo di banco y gobierno pa asina evita tur sorto di problema. Tin miyones di florin na auto ta kima den cura di cas sin un garashi,ora un auto perde color su balor ta baha. Aruba tin mas cu 80 mil auto, laga nos bini cu garage cu ta duna service y carwash anochi por ehempel ta habri di 4 pm -12pm y hasta por combine cu un mini Snack den cual e cliente por come algo mientras cu e ta warda riba su auto. Nos mester saca beneficio di locual nos tin hopi. Ban cuminsa cu negoshinan di empake di productonan di Latino-Anerica y via nos canalnan cu Europa nos por haci gran negoshi, pasobra asina cu e producto drenta Aruba e a drenta comunidad Europeo, y nos tur sa e beneficionan.Tin hopi empresa chiki cu por lanta y produci cupo di trabao, y tur hende tin mesun derechi di hanja permiso pa negoshi.
Si Hulanda kier supervisa, controla, y investiga nan ta welkom,pasobra esaki lo subi e nivel di Integridad y seriedad pa futuro generacion. Y ta di negocia cu Hulanda den tur locual nan kier haci, con nan lo yuda nos produci cuponan di trabao, pa tur esnan cu tin mester di trabao. Tin hopi negoshi cu ta gana plaka na Hulanda, cu por habri un filial serca nos aki banda. Si nan kier supervisa 7 aña nos kier mira 7 aña di inversion den economia di Aruba. Nos ta bay saca Bendicion for di Coreccion. Dios lo yuda nos pasobra e pida barranca aki no tin nada pa kibre. Pronto nos lo no depende solamente riba turismo como Fuente principal di entrada. Tur hende por haci uso di e plannan y visionnan duna door di nos ministerio, Pasobra Beibel ta siña nos cu esnan cu ta traha pa Señor ta e prome nan yama pa busca locual ta boluntad di Dios pa nan pais.
Nos ta reprende tur spiritu di Angustia, Miedo, Orguyo, y Maldad for di riba nos pueblo, y nos ta yama riba e gracia di Dios den tur curazon.
