Sperando cu e mensahe aki ta yega na bista of orea di un persona den necesidad di trabao, un persona enfermo, un famia kibra, un mama cu ta yora pa su yiu cu ta bay perdi, un tata desespera cu conoce su deber di tata, pero ta mira cu e situacion ta dificil, nos kier bisa lo siguiente : Den Mateo capitulo 9 vers 18 un tata cual ta un official di snoa a bay serca Hesus, a buig su dilanti y a bise, Mi yiu a caba di muri , ma bin pone bo man riba dje y e lo biba . Y Hesus a lanta y a siguie, y tambe su disipelnan.
E situacion aki ta mesun cos cu bo tin un auto y e no tin motor, y bo ta drenta sinta den dje y pidi Dios pa start e auto y asina bo por yega caminda bo tin cu bay. E homber aki tabata sa su situacion, e sa kico ta morto, e sa cu e no por haci nada pa su yiu, e a ninga di bay na e cas mortuoria, caminda ta atende cu morto, pero a bay serca Hesus cu ta duna bida.
Situacion ta dificil, pero no imposibel pa Dios, hopi biaha ora situacion dificil bati na nos porta, nos ta corre bay tur caminda, bati na porta di hende cu no por yuda cu nada, haci un fanfaria, subi facebook, bati na porta di politico, desgaba dokternan, insulta polis,insulta ambulance , y tur otro medio cu por yuda nos , pero nos ta lubida cu pa Dios nada ta imposibel.
Hopi biaha nos ta mira muchanan ta sali for di man, y nos ta puntra na unda nan tata ta, pasobra como cabes di cas e tata, ta esun cu mester sali dilanti pa bienestar di su yiunan, den e caso aki e tata a bay serca Hesus.
Ta hopi importante ora un tata ta halsa oracion den cas, pasobra e proteccion di Dios lo baha riba henter su cas, pasobra ora un tata ta biba pa Dios, Dios ta cuida y santifica cu cas.E oracion di un tata pa su famia ta un necesidad di tur dia, nunca un tata no por ta asina ocupa, cu e no ta haci oracion pa su famia ni tampoco e tin tempo pa Dios.
Ta importante pa tata lanta ariba y tuma su responsabilidad spiritual den su hogar, pasobra mescos cu deber ta pa cria bo famia, asina tambe bo tin un deber dilanti Dios pa guia bo famia den e caminda di Señor, pasobra si bo no hacie e ta bay bira visto un dia pa otro cu abo como tata, no a busca e direccion di Dios pa bo famia.
Pasobra tin hopi hende ta pensa cu si mi tin un bon cas, auto, y otro cosnan di luho mi famia ta feliz,pero un famia sin Dios no ta feliz, y e tata ta esun responsabel pa guia su famia na Dios.E responsabilidad di un tata ta grandi, pero ora un tata aserca trono di Dios, tur cos ta cambia den cas, pasobra e ta bini dilanti di Dios den e autoridad cu Dios a dune y Dios ta respalde, pasobra ta Dios un duna tata e autoridad pa ta cabes den obedencia y sumicion na Dios.
Un biaha mas nos kier recorda cualkier persona cu ta pasando den un tempo dificil, cu pa Dios nada ta imposibel, y si bo aserca Dios e ta yuda, corda cu Hesus a alcansa y a tene e mucha na su man y e a lanta.
