Hende hopi biaha no ta compronde e misericordia di Dios,pero e palabra di Dios ta bisa : Lo mi tin misericordia di esun cu Mi tin misericordia, y lo mi tin compasion , di esun cu mi tin compasion.
Asina anto no ta depende di e hende cu kier,ni di e hende cu ta corre, sino Dios kende tin misericordia.
Bijbel ta conta nos di un muher cu a wordo gara den e acto di adulterio, cu e den e tempo ey tabata wordo castiga cu castigo di morto.
Pero a presenta esun cu ta extende misericordia nan nos tur , esun cu no a bin pa condena, pero E a bin pa salba, y su nomber ta Hesus, y su presencia den e pueblo a cambia e situacion.
Di prome e acusadornan a trece e muher su so, bisando cu e muher a wordo gara den e acto di adulterio.
Nos tur sa cu adulterio ta algo cu dos hende mester bay di acuerdo cu otro pa asina e hecho por tuma lugar. Pero den e caso e acusadornan a trece e muher so, y bisa Hesus cu Ley di Moises ta bisa cu hendenan asina mester wordo piedra.
Nan no a trece e homber, pasobra pa nan ta e muher ta e piesa principal di e asunto , y muher tin cu wordo castiga, pero Hesus ta huzga cu un midi husto.
Nos tur conoce e historia, cu Hesus a wak rond, pasobra solamente Dios conoce e curason di hende, y eynan E a bisa esun cu ta sin pica tira e prome piedra.
Cu e palabra aki Hesus kier bisa, cu nos cu ta hende tur a faya, pesey e palabra di Dios ta bisa: Ma Dios siendo rico den misericordia, pa motibo di Su gran amor, cu cual E a stima nos, hasta tempo cu nos tabata morto den nos transgreshonnan, a haci nos bibo hunto cu Cristo. ( Pa medio di gracia boso a wordo salba).( Efesionan 2:4-5).
Pesey Señor ta anhela di ta misericordioso cu boso, y pesey E lo wordo halsa pa tene compasion cu boso. Pasobra Señor ta un Dios di huicio: bendiciona ta tur esnan cu ta spera riba dje.(Isaias 30:18).
Husticia y huicio ta fundeshi di bo trono,misericordia y berdad ta sali bay bo dilanti.(Salmo 89:14).
E hende misericordioso ta haci bon na su mes alma, ma e hende cruel ta tormenta su mesun carni.( Proverbionan 11:17).
Bendiciona ta esnan misericordioso, pasobra nan lo ricibi misericordia.( Mateo 5:7).
Dios ta extende su misericordia y pordon na tur ser humano, y esey no ta hende ta dicidi, pero esey ta Dios ta dicidi, pasobra curazon di hende ta duro, pasobra nan kier sacia nan set y hopi biaha nan kier husa palabra di Dios pa esey.
Esnan cu acusa e muher a bin bisa Hesus cu e Ley di Moises ta bisa cu mester piedra e muher, esey ta nifica cu Hesus no haci manera nan ta pensa, Hesus no ta cumpli cu e Ley di Moises.
Pero e proposito pa cual Hesus a bini na mundo no ta pa condena sino pa salba, pero ora hende no kere den Hesus e Yiu unigenito di Dios nan lo ta condena.( Juan 3:16-17).
E historia completo a tuma lugar den Juan 8:3-11 y e misericordia y compasion di Dios a triunfa,
Hesus a puntra e muher ken a condenabo? E muher a contesta ningun hende, y Hesus abisa Ami tampoco no ta condena bo,bay y di awor padilanti no peca mas.
E misericordia di Dios ta di generacion pa generacion, y e ta wordo extende na tur hende.
Sinceramente, Pastor Marcel Balootje.
