Salmo 127:3 ta bisa: “Yiunan ta un herencia (regalo) di Señor, e fruta di barica ta un recompensa.
Bo yiu ta e bendicion cu Dios a duna bo como mayor, awo con abo ta trata bo regalo of bo bendicion? Pasobra tur cos ta depende con abo como mayor trata, guia, educa, coregi y di esey lo bo cosecha.
Prov 22:6 ta bisa: “Instrui un mucha den e caminda cu e mester cana y hasta ora cu e bira bieu e lo no aparta si mes for di dje.”
Ta for di chikito e educacion na cas ta cuminsa, pasobra ora e mucha bira grandi, ta bira dificil pa sembra den dje. Locual e mester a ricibi for di chikito, ta p’esey bo ta mira hopi mayor cu man na cabes y ta bisa cu nan no por mas, pasobra nan no a tuma e asunto na serio, ni tampoco balora nan regalo di Dios.
Pa stima bo yiunan y dedica tempo na bo famia, bo no tin mester di placa. Ta bo presencia como mayor ta conta. Ningun hende no por duna bo yiunan e calor cu nan mester. Ni nan wela, ni bisiña, ni tampoco crèche no por haci locual abo como mayor mester di haci. Y no lubida cu bo ta yama pa Dios pa hacie. Asina ta no sea slordig den cuido y educacion di bo yiu.
Proverbio 17:6 ta bisa: “Nieto ta corona di hende bieu y gloria di yiu ta nan mayornan.
Bo ta e gloria di bo yiunan. Tur mayor mester sa esey y mester biba p’esey. Bo ta como mayor e modelo preferi di nan bida, e persona cu nan ta stima, esun cu nan ta depende di dje.
Awo tur mayor tin cu realisa cuanto daño violencia domestico, divorcio, adulterio, abuso of e bida di paranda por haci na un mucha.
No laga nos bay mas profundo. Ora tin uzo di droga, bruheria, ladronicia, etc. den presencia di mucha.
Efesios 6:1 -4 ta bisa: “Yiunan, obedece boso mayornan den Señor, pasobra esaki ta husto.”
Honra bo tata y bo mama (cu ta e prome mandamento cu un promesa) pa bay bo bon y pa bo tin bida largo riba tera.
Y boso mayornan no provoca boso yiunan na rabia, ma lanta nan den e disciplina y educacion di Señor.
Ta depende di abo como mayor con bo yiunan lo lanta pa nan haya nan bendicion y pa tur cos bay nan bon.
Pa bo lanta yiu den Señor, abo como mayor mester ta biba pa Señor pa asina bo por ta ehempel y testimonio di e grandesa di Señor den bo bida y bo yiunan lo mira, aprecia y siña for di esey.
Isaias 54:13 ta bisa: “Señor lo siña tur bo yiu hombernan y e prosperidad di bo yiu hombernan lo ta grandi.
Mayor, awe mas cu nunca un yamada ta haci na abo pa aprecia bo famia cu henter bo curason.
