Den 1 Corintio 13 vers 11 . Pablo ta bisa algo sumamente importante pa tur hende tene cuenta cune den tur situacion di bida, sea ta den bo hogar, negoshi, trabao, gobierno, salud, bienestar di bo famia, bo estudio,matrimonio, finansas, condicion social di bo prohimo,y tur institucion spiritual, etc, etc, y ta lo siguiente:
Tempo mi tabata mucha , mi tabata papia manera mucha, pensa manera mucha, rasona manera mucha, ma awo cu mi a bira homber, mi a pone cos di mucha un banda.
E palabra aki ta nifica cu tin cierto porta cu tin cu wordo cera den nos bida, si berdaderamente nos kier mira adelanto, pasobra tin hopi comedia cu hende ta hunga, pero cu segun bo ta bira grandi como un persona madura e modus operandi ey no ta funciona pa hende grandi, pa e respet, moral, integridad y seriedad cu hende ta spera di bo.
Un ehempel masha conoci ta nos falta di pordon. Pasobra hopi hende ta gusta biba den pasado di otro, pasobra e pasado ey ta cumbini nan pa rebaha un persona, y halsa nan orguyo, pa mustra cu nan ta bon y e persona ey ta keda abao pasobra cu nan palabra y forma di pensa nan ta domine.
E technologia diabolico aki tin hopi hogar kibra, dividi, hende ta biba hunto, pero nan curazon ta leu for di otro, y e amor cu mester cubri cada falta no t’ey. Nos ta haci manera nos a pordona, pero nos ta usa un situacion di pasado, pa recorda un persona su fout, y asina trata di haci e persona ciego, of tur esnan cu ta huntu cu ne, cu abo no ta mira cambio den dje.
Por ehempel un mama a comete adulterio, y asina e divorcio a tuma luga. Pero tempo a pasa y e yiunan a bira grandi. Y awo e tata ta keda ripiti constant na e muchanan ki tipo di muhe e mama tabata, pa asina mustra nan cu e ta e homber perfecto y e mama ta fo’i ordo.
Instigacion den famia of cualkier organisacion ta maldad, imagina un tata a haci un fiansa pa cumpra algo util den cas, ( p.e. frishidel) cu tur hende ta usa, y tur hende ta mira e necesidad di e cos, pero e mama tabata desea di bay cu vakantie. Ta dificil pa sigi instiga e yiunan contra nan tata sabiendo cu e haci bon,y keha cu tur luna tin di paga fiansa , pasobra e simpel hecho por y ta dividi un famia.
E simpel hecho di no pordona, of cada rato trece pasado dilanti, pa asina recorda un hende riba su fout , cual Dios mes a pordon’e hopi aña pasa, ta demostra un sistema mediocre, y anti-crecemento.
Ora Hesus tabata muriendo na cruz e grita y bisa : Tata pordona nan , pasobra nan no sa kico nan a haci Lucas 23:34, Hesus a mustra nos cu bo no por drenta shelo, cu hende riba bo curazon.
Sin pordon no tin madurez, ni tampoco crecemento.
