Realidad amargo y hopi delicado. Kico ta nifica un mayor cu ta complice di su yiu, esey ta nifica cu e mayor ta completamente na altura di e mucha su movecion, actitud, bida cual e ta biba, y ta bay di acuerdo sea pa beneficio of pa miedo.
Esey ta un problema grandi, pasobra asina un mayor ta duna su yiu luz berde pa haci locual cu e kier, e no por coregi e mucha mas.
Ora un mayor sa cu su yiu ta cana cu arma, e mester papia cu ne pa e stop di cana cu arma, y si e no ta tende e mayor mes tin di haci un denuncia, pasobra e mayor ta core peliger, e mucha ta core peliger, e ta un peliger pa comunidad( 2 Samuel 2;12+25a). Si bo sa cu bo yiu ta den gang di atracado, como mayor bo no por tapa nada pe ni tampoco sconde e mucha for di autoridad, igual ta conta pa bendemento di droga etc.
Ora bo ta fia bo yiu bo auto pa e core y e no tin rijbewijs ,ora bo permiti amiga of amigo keda drumi sin avisa nan mayornan , ora bo ta permiti bo yiu sali tur fin di siman, sin sa cu ta cu ken y na unda e ta bay, y ora bo mes ta permiti bo yiu bebe of droga bo ta su complice etc. etc.
Hopi biaha e asunto di complice ta cuminsa ora e yiu tin algo pa sconde di bo como mayor, sea e a mira bo haci algo cu no ta bon y asina e ta cohe un bentaha riba su mayor, of door di divorcio bo a keda cu un yiu cu bo no por controla, tambe ora tin un mama soltero of tata hopi biaha e yiu ta haya cierto libertad pa asina e mayor por haci locual cu e kier.
Den situacion aki e mucha ta wordo declara grandi prome cu su tempo, y ta existi e posibilidad pa e mayor bira su complice.
Ora bo ta permiti bo yiu muhe of homber menor di edad tin relacion cu un persona mayor di edad , bo ta su complice.
Tur locual nos ta skirbi ta mustra diCon nos problema social, criminalidad y inmoralidad a aumenta. Caminda no tin Temor di Dios maldad ta crece. Bijbel ta bisa den Proverbio 22;6 Instrui e mucha den e caminda cu e mester cana y hasta ora e bira bieu e lo no aparta for di dje.
Proverbio 29;17 Coregi bo yiu , y e lo duna bo trankilidad, si e lo haci bo alma contento,
Proverbio 19;18 Disciplina bo yiu mientras tin speransa ainda y no desea su morto.
Colosenses 3:20 Yiunan sea obedecido na boso mayornan den tur cos, pasobra esaki ta agradabel na Señor.
Proverbio 29:15 Bara y reprendemento ta duna sabiduria ma un yiu laga pa su cuenta ta pone su mama na berguensa. Si bo ta un mayor y bo a ripara cu e mensahe aki a bati na bo porta, y bo ta pasando den un situacion similar, por fabor no duda ningun momento pa busca ayudo spiritual y social.
Tur cos ta posibel si bo tin fe.
