Tony Geerman ta un trahado di Serlimar, pero tambe un usuario masha satisfecho di e servicio y tratamento cu el a ricibi na Hospital. El a yama 24ora.com pa manifesta su elogio y pidi otronan pa ta consciente di loke nos tin na Aruba mes. “Nos tin cu aprecia nos dokternan. Nan a haci un tremendo trabou. Ami no tin palabra pa gradici nan,” e ta bisa.
Poco mas di un luna pasa, el a hay’e den un situacion caminda el a busca atencion medico. “Ora di critica berdad mester critica pasobra ta mehora servicio, pero mi no tin nada di critica pasobra ta trato sublime mi a haya di dokter Jones,” asina Geerman a bisa. Tambe e ta recorda y gradici un representante di dokter Jones, un juffrouw di Surinam y e dokter su asistentnan.
Nan a diagnostica cu e tabatin un bacteria den su stoma y tripa, pa cual a recomenda pa e bay un specialista. Despues di a consulta cu dokter Franca, pa cual tambe e tin masha palabra di elogio, mescos cu pa su personal, a descubri cu e tin cancer di tripa. Esey a pone a opera dia 22 di november ultimo cu dokter Smeets. “Otro dokter cu a haci un tremendo trabou,” Geerman ta conta.
“Nan a opera mi y tur cos a bay asina bon cu mi a haya na su luga pa mi elogia na. Pasobra semper mi ta wak critica den direccion di hospital. Pueblo di Aruba nos tin cu aprecia loke ta di nos. Mi tambe ta pagando un prima di AZV, pero ta mescos cu ora bo ta traha un cas. Ora hende traha cas pa bo, si nan haci un tremendo trabou, bo a inverti. Aworakinan mi a paga un prima y tur e conciudadanonan ta sigura riba e pais aki,” asina Geerman a declara, añadiendo cu “Nos mester ta contento y gradicido cu nos ta biba riba un pais cu Seguro Medico General pa tur conciudadano goza di dje. Ta di aprecia cu AZV a bin pa cada conciudadano tin un seguro general.”
E ciudadano ta sigui splica cu e ta compronde tambe cu hopi hende a probecha di e situacion y door di esey AZV a bay den un sistema dificil cu nan mester corta. Na principio hende a probecha, a abusa di e situacion di AZV anto nan a bay dokter asina hopi tra’i otro, busca hopi medicina, anto door di esey e situacion ta poco precario.
E ta conta cu el a haya conseho pa bay afo na Colombia. Hopi hende a bisa mi cu e dokter na Colombia ta bisa cu dokter na Aruba no ta haci bon trabou. Geerman ta compara esey cu mecanico splicando cu un mecanico no ta bay papia bon di otro mecanico.
E ta haya cu su elogio ta na su luga y ta gradici 24ora pasobra mescos e medionan di comunicacion t’ey pa critica, ta gradici cu 24ora.com t’ey pa elogia tambe. Ta kere cu door di elogia nos mester educa pueblo, conscientisa nan, civilisa nan pa aprecia locual ta di nos.
Geerman: “Ami ta akinan para pa gradici nan. Cada un, di e nurse, e cleaner, e ciruhanonan; mi no tin palabra pa gradici nan.” El a gradici tur Hulandes y Filipino tambe cu a atende asina contento y amabel. “Ora bo bin hospital, di mes bo ta malo caba y bo ta ricibi un trato asina; bo ta sali contento. Asina un bunita hospital cu mi a bruha entre hospital y hotel. Nos mester aprecia loke nos tin paso pafo ta nos placa nan kier. Nan ta bay keda critica nos dokternan, pero ami t’ey akinan pa elogia nan,” asina Geerman a finalisa bisando.
