Diaranson Parlamento di Aruba un biaha mas a tene reunion publico pa asina vota riba e ley di matrimonio di mesun sexo. Luna pasa caba a trata e topico aki y e votamento a termina tabla. Un biaha mas e resultado a termina empata y Parlamentario Shailiny Tromp-Lee a bolbe scoge pa no vota. Esey ta pone cu e ley no a pasa y awo mester warda resultado di casacion. Tin cu ta contento cu e resultado aki y otro no.
Marco Berlis, Parlamentario (MEP), a indica cu na 2021 MEP a campaña riba e echo cu nan ta contra matrimonio di mesun sexo. Si mira e votonan, e ta traduci den esey tambe. Aunke e no ta 100%, 90% a refleha n’esey. Nan a para p’esey y MEP a representa esunnan cu a vota pa nan corectamente.
E Parlamentario ta contento cu e resultado. El a splica cu esey ta loke nan a lucha p’e y su persona ta para contra matrimonio di mesun sexo. Realmente e no a spera algo diferente, pasobra den politica consistencia ta algo importante. Esey t’e motibo cu nan a drenta cu confiansa sabiendo cu e lo ta rechasa door di un empate. E ta corda cu algun luna atras tabatin hopi diferencia di opinion y tabata mustra cu e ley lo pasa.
Frank Daal, Iglesia Cristian Aruba (ICA), a indica cu semper nan a bisa cu ora ta papia di moralidad di un pais, no por trat’e manera un wega di futbol di gana of perde. Pero ta haya cu si ta bay papia di gana of perde, Aruba a gana y logra preserva moralidad. Esey ta significa cu a logra preserva matrimonio den su forma original manera Dios a crea, esta homber cu muhe, y di eynan nan ta procrea.
Den e diseño ey, e ser humano ta protegi, ta bon. Tras di matrimonio a logra cuida ta famia. E ta haya cu famia ta miho lanta den constelacion di hende homber y muhe. Tambe ora ta papia di genero, mester bay den educacion y haci algo eyden. Nan a logra proteha educacion.
Ryçond Santos do Nascimento, Parlamentario Independiente, a indica cu tin un comunidad tradicional, comunidad cu ta kere den norma y balor conservativo. Esey tabata refleha den e votamento. Tambe por mira e caminda p’e reunion aki, unda tabatin marcha, momento di buscamento di firma. Tabatin diesocho mil hende cu a bisa di ta contra e ley di matrimonio di mesun sexo. Nan tabata pro pa bay casacion y esaki ta cuestion cu tin dos caminda ta cana paralel. Na final di dia locual ta importante ta cu ta biba den un pais democratico, tin un decision democratico tuma.
Pa mas lesa TREMPAN.COM.
