Partido Democraat ta prekupá ku gabinete Pisas no ta kumpli, pa kua motibu Hulanda a postponé toma di desishon
Gobièrnu Hulandes a tuma e desishon den Konseho di Minister di Reino djabièrnè último pa wanta ku dunamentu di un siguiente tranche pa Kòrsou.
Durante un rueda di prensa djaweps último Promé Minister Pisas a atvertí komunidat riba un posibel ola nobo di Covid-19 i ku nos mester evitá esaki a todo kosto.
Democraat ta di opinion ku nos ekonomia no por karga otro lockdown òf ku mas hende ta bai kai den insertidumbre dor di pèrdidá di trabou. Ya kaba nos a mira ku Hulanda a hañ’é ta bai den lockdown pa motibu di e variante Omicron. Realidat ta si ku Hulanda ta un pais ku un ekonomia fuerte ku por karga ku e konsekuensianan finansiero. Pero pa Kòrsou e kos ta otro.
Ku e posibilidat di un otro ola na kaminda aki na Kòrsou tambe, sigur despues di dianan di fiesta, nos tur por pensa kaba kiko esaki lo por nifiká pa nos ekonomia i kaha di Gobièrnu si nos tambe ta haña nos ta bai den otro lockdown. Pues e echo ku Kòrsou no tin garantia di por disponé di fondonan adishonal, ta rekerí tur atenshon i seriedat di Promé Minister Pisas i Minister di Finansa Silvania.
P’esei pa Democraat ta insólito ku e Minister di Finansa, ku netamente a haña e mandato di gabinete Pisas pa atendé e trayekto di Coho, ta bai ku vakashon pa 5 siman. Sigur mirando ku ta apenas 6 luna e minister ta den funshon.
Esaki segun Democraat ta gobernashon iresponsabel, sigur mirando último desaroyonan.
