Dia 18 di juni 2024 e Parlamentarionan a vota riba e ley di matrimonio di mesun sexo. Un ley cu pa di 2 biaha a keda empata na 10. Nos por mira cu tin Parlamentario cu a keda decepciona pasobra e ley no a pasa. Partido Curpa ta kere cu mayoria den Parlamento ta na fabor di e ley aki. Locual cu a stroba e ley aki di tabata aproba ta pasobra e tabata presenta den porta di eleccion. Nos por a tende con un periodista a expresa cu partido MEP y partido AVP a brasa otro.
Un muestra cu e ley no por a pasa. Gobierno no ta carni ni pisca. Di un banda lider di partido MEP a laga traha e Aruba National Gender Policy na aña 2022 y a expresa bon cla cu no por discrimina. Di otro banda a sucumbi parcialmente pa e presion di e diesocho mil firma cu a entrega dia di e manifestacion.
Partido MEP kier bay shelo, pero no kier muri. Parce cu lider di partido MEP a reuni cu e Parlamentarionan prome cu a trata e ley aki dia 18 di mei 2024. Partido MEP ta bon na altura cu si pasa e ley prome cu eleccion, e lo perde mas voto cu si rechasa e ley. Remarcabel ta con pa di dos biaha partido MEP a nenga di apoya un ley proponi entre otro pa partido Raiz. Y partido Raiz ta keto keto. Ta laga principio un banda pasobra e stoel den Gobierno y Parlamento lo mester ta masha agradabel mes.
Locual cu pueblo no mester lubida ta cu e ley di matrimonio di mesun sexo ta hinca den punto 5 di Sustainable Development Goals cu ta papia di igualdad di genero. Nos por mira cu den luna di september tanto Gobierno como Parlamento ta dorna edificio cu e 17 puntonan di Sustainable Development Goals.
Nos ta den nan luna di orguyo p’esey bo por mira diferente edificio cu a hisa e bandera di seis color. Gobierno, cumpliendo cu e Sustainable Development Goals, tin pa ehecuta un plan macabro cu a cuminsa cu geregistreerd partnerschap y a sigui pa e matrimonio di mesun sexo. E siguiente stap ta pa legalisacion pedofil.
Den e parti di educacion ta sigui tambe enseñansa di e ley aki na nos scolnan. Esaki no mester ta un misterio pa nos pueblo, pasobra unda e agenda aki tabata introduci a sigui cu e enseñansa tambe y asina confundi nos criaturanan. E 17 puntonan di e agenda 2030 mester keda cla na 2030.
Nos por corda cu na september 2015 tempo cu partido AVP tabata den gobierno a firma e acuerdo aki. Gobierno di partido MEP a sigui cu n’e y a bay asina leu di a firma na december 2020 cu Common Trust Network di World Economic Forum. Esaki mester introduci e paspoort digital y tambe mester bin e moneda digital. Locual cu ta paspoort digital y moneda digital ta un instrumento pa controla pueblo. Rond mundo tabata tin e partidonan socialista cu ta pusha e gobierno globalista.
E partidonan politico cu ta apoya agenda globalista kier mantene estado for di religion. E motibo principal pa mantene Dios afo di gobierno pa e partidonan socialista aki ta pasobra e Sustainable Development Goals ta bay contra leynan di Dios. E politiconan kier voto di e pueblo cristian, pero nan kier tene Dios afo di Gobierno.
Kier e votonan di e cristiannan pero nan no kier honra Dios. P’esey nos ta yama nan supuesto Parlamentario cristian pasobra bo no por brasa diabel y kere bo por tene man di Dios. Nos Dios ta radical y su si ta si. Partido Curpa e unico alternativa.
