Di acuerdo cu vision di Minister Andin Bikker, leynan ta e ‘software’ di un pais, pasobra practicamente tur area di nos sociedad ta wordo reglamenta dor di ley, sea ta nos constitucion, ordenansa- of decretonan. Pesey den cuadro di e maneho di Ministerio di Husticia y Gabinete Wever-Croes, modernisacion di nos leynan tin hopi prioridad, pa comunidad por conta cu leynan actualisa.
Awe mainta mr. Andin Bikker hunto cu Parlamento di Aruba lo trata dos proposicion di ley cu lo modernisa nos leynan despues di hopi tempo riba areanan importante. Un di e leynan ta e ley pa introduci un Codigo Civil Corporativo (CCC) nobo, na Hulandes conoci como “Boek 2 van het Burgerlijk Wetboek’, cu ta codigo ta regula entidadnan corporativo manera N.V., V.B.A., Stichting y Vereniging.
Asina introduci e CCC of ‘Boek 2’, e lo reemplasa entre otro e Codigo Mercantil (‘Wetboek van Koophandel’), ley cu ta data di varios decada. Na 2019 a haya a aprobacion di Parlamento pa e Boek 2 (AB 2019 no. 38). Sinembargo, pa introduci e ley aki lo mester prepara un asina yama “invoeringsverordening”, cu lo adapta varios otro ley cu por ehempel ta acopla of referi na e ley cu lo reemplasa ora introduci e ley nobo. Departamento di Asuntonan Legislativo y Huridico (DWJZ) hunto cu un Profesor di Hulanda a traha riba e invoeringsverordening pa Boek 2.
Ta trata aki di un ley hopi importante pa inversion y desaroyo economico via corporacionnan (NV, VBA) y pa sector social, deportivo y caritativo cu ta haci uzo di fundacionnan y asociacionnan. Pa e sector di notarionan, cu na 2019 a wordo amplia cu aprobacion di Parlamento (AB 2019 no. 23) y pa sector huridico y di abogacia, introduccion di e CCC of Boek 2 lo ta un adelanto enorme, despues di decadanan ta traha cu e Codigo Mercantil, cu pues ta un ley bastante anticua. Tambe lo trata awe den Parlamento introduccion di un regulacion specifico pa contratonan digital, un ley cu, igual cu Boek 2, pa basta tempo caba ta un realidad na Corsou, Sint Maarten y Hulanda, y ta necesario mirando e realidad economico di compranan virtual via Internet.
