Algun tempo atras Parlamento di Aruba a ricibi e Nota di Comienso di Aña 2024 y hunto cu ne e prome Presupuesto Supletorio pa aña 2024 cu ta contene e cambionan den maneho cu ta rekeri aprobacion di Parlamento. Un di e cambionan cu ta resalta ta e entrada extra cu a realisa debi na e mehoracion di cumplimento di pago di belasting y crecemento economico. Gabinete Wever-Croes a informa cu entrada extra aki den Presupuesto 2024 lo ta destina pa mehora e poder di compra di varios grupo den comunidad.
Indexering
Ta conoci cu Gobierno a yega na un acuerdo cu sindicatonan pa indexa salario di e empleado publico pa mehora nan poder di compra. Un parti di e indexering lo tuma luga den luna di juli 2024 y pesey den e prome Presupuesto Supletorio 2024 ta aloca fondo pa e indexering aki.
Reparatietoeslag
Den e Presupuesto Supletorio tambe ta aloca fondo pa asina por brinda trahadonan cu ta gana menos di 2500 florin pa luna y e pensionadonan di SVB un subida di e reparatietoeslag.
Bijstand
Pa mehora e poder di compra di esnan mas vulnerabel den comunidad, den e Presupuesto Supletorio tambe ta aloca fondo pa asina por hisa e suma di bijstand pa esnan cu un limitacion.
Trahado di fundacion subsidia
Pa e trahadonan cu ta traha na fundacionnan cu ta haya subsidio di Gobierno, den Presupuesto Supletorio lo pone fondo pa e fundacionnan aki por ahusta salario di nan trahadonan pa mehora nan poder di compra. E fundacion subsidia pa Gobierno lo mester haci un peticion apart pa e fondo extra y esaki lo wordo duna bou e condicion cu pir uza e fondo solamente pa gasto di salario y no pa otro gasto di e fundacion.
Aprobacion di Parlamento
Gobierno ta spera cu Parlamento por aproba e prome Presupuesto Supletorio pa aña 2024 pa asina varios grupo den comunidad por haya ayudo cu nan poder di compra.
