Dialuna merdia durante un rueda di prensa teni na oficina di Parlamento Hubenil directiva y hobennan a presenta nan idea pa renoba Fundacion Parlamento Hubenil 2021.
Manera sa 2020 a scoge un directiva nobo pa yuda e hobennan cu a keda den e fundacion pa asina lanta bek Parlamento hubenil tanto den structura y maneho pero tambe den miembresia di nos hobennan.
Durante un periodo caba ta trahando riba diferente cambionan pa asina por relansamento Fundacion Parlamento Hubenil. Parlamento Hubenil ta para pa derecho di mucha y hoben y nan derecho di tin libertad di expresion y di informacion.
Parlamento Hubenil (PH) ta stimula e derechonan specifico aki a traves di training, workshop, proyecto y debatenan. PH tin un solo meta. Pa motiva y duna tur herment necesario pa yuda den e desaroyo personal y profesional di nos hobennan y cu mas firmeza, pusha nan participacion den nos comunidad.
Un di e cambionan pidi ta e logo di Parlamento Hubenil. Ta duna oportunidad na nos comunidad pa ta parti di e cambio aki door di participa exponiendo nan creatividad den un logo.
E logo aki mester por refleha riba e derechonan di libertad di expresion y opinion cu respet pa otro, libertad den pensamento, creencia y religion. Libertad pa reuni den grupo treciendo informacion pero teniendo na cuenta semper riba derechonan humano. Den un forma pa laga nan bos ta scucha.
Por uza cualkier forma sea ta pintura, digital, sketch, importante ta pa splica bo diseño y colornan cu bo ta uza. Dia 12 di augustus 2021, PH lo revela e logo ganado pa celebra dia internacional di hubentud.
