“Na e momento aki, ami Aquannette A. Gunn a dicidi di reacciona relaciona cu tur loke ta bayendo rond riba medionan social. Na prome luga mi kier enfatisa cu segun e Ordenansa Electoral ami a keda apunta pa forma parti di e 21 parlamentarionan di pais Aruba pa e siguiente 4 aña”, asina relato di e futuro miembro di parlamento pa partido MAS ta inicia bisando.
“Ta berdad cu cada candidato a firma un protocol, cual tabata un palabracion interno y ta basa riba confiansa. Mi persona no ta confia Solangel Lacle debi na su comportacion insano durante henter e campaña cu a laga un sabor amargo y di desconfiansa cerca mi persona. Ademas el a uza e protocol como tool di campaña contra di su mesun coleganan door di pidi hendenan vota p’e y no pa su coleganan”, segun e maestra di scol, Aquannette Gunn ta conta.
E futuro parlamentario ta insisti cu Solangel Laclé no tabata sigui palabracionnan haci durante reunionnan di partido, mucho menos e tabata respeta nan. Tambe el a practica canibalismo politico. “E tabata pidi mi famia y amistad na un forma insistente y persistente pa vota pa su persona enbes di mi. Esaki pa mi ta muestra di falta di etica y falta di colegialidad y pa mi el a demostra di ta un persona inconfiabel. Si durante henter campaña el a sa di viola palabracionnan haci, ki garantia partido MAS por tin den integridad y honestidad di un persona asina”, segun Aquannette Gunn.
Mesun cos cu partido POR a haci den eleccion 2017, e biaha aki ta partido MAS a laga su shete candidatonan firma un documento den cual nan ta acepta cu esun cu tin mas voto ta drenta parlamento. Na 2017 partido POR a logra door di manda Joselin Croes como Minister Plenipotenciario na Merca, pa want’e fo’i parlamento pasobra Alan Howell a haya mas voto cu ne. Pero den bida real esaki lo ta e prome biaha pa prueba si e sistema ami ta funciona, pa “by-pass” nos ley electoral cu ta stipula cu segun orden di number ta drenta parlamento, of si e candidato saca su mes cu voto preferencial.
Den e caso specifico aki, e top cuater di MAS ta Marisol Lopez cu 4191 voto, sigui pa candidato #2, Aquanette Gunn cu 77 voto y candidato #3, den persona di Bartholomeus Koster cu 37 voto. Sinembargo candidata #4 ta Solangel Dinmohamed Lacle cu 189 voto riba su nomber. Y mesora despues di saca resultado di votonan individual, el a anuncia riba red social cu e ta drenta parlamento.
Pa esaki sosode, ambos Gunn y Koster lo mester a distancia for di nan asiento den parlamento pa por traha caminda pa Solangel Lacle por drenta. Aunke e ta zona un asunto facil, logico y basa riba un acuerdo adelanta, toch el a bira un bataya e dos candidatonan ta para riba cu nan kier nan asiento.
Den caso cu MAS drenta gobierno, esey lo bira mas facil pasobra por acomoda nan den cualkier otro funcion. Asina a haci den POR cuater aña pasa. Pero den e caso cu MAS keda den oposicion, e ora ey e dos candidatonan lo no laga nan oportunidad pa sirbi nan votadonan den parlamento bay.
Partido MAS
Holmo Henriquez a funda Movimiento Arubano Soberano (M.A.S) dia 17 di september 2015 y formalisa na december 2016. Ideologia di PartidoMAS ta kibrando barera y creando futuro. Lider desde su fundacion ta Holmo Henriquez. Nan a participa un solo biaha na eleccion, na September 2017 y a logra 287 voto. E cantidad di votonan ey ta practicamente mita di e cantidad nan a haya como firma di sosten, cu tabata 551 firma. Henriquez a dicidi cu no ta sigui na mando di e partido y a haci traspaso di e partido. Awo na cabes di e partido ta drs. Marisol Lopez-Tromp, kende ta un persona cu tin mas di 20 aña den mundo politico.
