“Como pais nos ta inverti den material y infrastructura pero tambe den tecnologia y recurso humano pa garantisa siguridad di nos pueblo. Aruba awo tin un Operation Command Center. Un centro di mas moderno den ful nos region y esaki no solamente door di e inversionnan den material y infrastructura, pero tambe door di e hecho cu ta trata di un colaboracion entre diferente entidadnan di Cuerpo Policial mes, pero tambe entre Cuerpo Policial y otro departamentonan den e cadena hudicial.” Esaki ta pensamento di parlamentario di fraccion geel Shailiny Tromp-Lee ta bisa despues di a bishita e Centro di Comando, situa na Savaneta, ex-warda di polis.
“Siguridad di un pais no ta algo cu ta bin di su mes. Ta rekeri di e inversionnan necesario den nos departamentonan hudicial pa nos por garantisa siguridad. P’esey mes como parlamentario mi a aproba e maneho y inversionnan proponi pa Minister Tjon na diferente ocasion. Inversion den material y infrastructura, pero mas importante ainda inversion den tecnologia y recurso humano (esnan cu ta haci e trabou).”
E Operation Command Center ta forma parti di e dos otro pilarnan di e vision pa garantisa siguridad, esta tecnologia y recurso humano, inversion den polisnan, e ta bisa.
Despues di a haya un recorido y splicacion di e operacion dia 21 di juni, “mi por bisa cu e ta impresionante. Un Operation Command Center moderno y yena di innovacion. E centro aki ta bay atende yamadanan di Central di alarma, y ta monitorea diferente parti di nos isla cu un total di 258 camera y radar rond di Aruba.
Ta trata aki di un sistema di camera ubica na diferente parti di nos isla cu e meta pa eleva e siguridad tanto pa nos pueblo como pa nos bishitantenan. E sistema di cameranan aki ta basa riba ‘realtime intelligence’ cu momento cu tin un sucedido por tin acceso inmediatamente, cual sigur tin su beneficionan. No solamente pa e trabou como polis den accion pero tambe esun di investigacion.
