Den e ultimo simannan nos Grandinan a haya hopi atencion den medio di comunicacion y di nos politiconan como resultado di entro otro e situacion preocupante cu ta transcuriendo na SABA.
Den e ultimo decadanan, nos Grandinan cu nan grandesa y perseverancia a construi e pais aki cu nos ta habita cu orguyo. Cu fervor y perseverancia nan a construi nos nacion pa asina nos tur awe por gosa di e frutonan cu cada un di nan logronan a genera pa nos como pais y como individuo ariba nos pais.
Bida den su curso natural ta prescribi cu for di e legado cu nos por goza di dje awe como herencia, nos lo mester ta inspira y traha cu curashi pa e presente cu nos Grandinan merece. E creacion di un presente digno mester ta mas cu un meta pa nos, cu tin e deber di carga e cuido di nos grandinan e tempo nos dilanti. E deber husto aki mester traduci su mes den punto primordial di cuido di un pais.
Banda di derecho igual den cuido medico pa nos Grandinan nos lo mester crea hunto e oportunidadnan pa nan por sinti nan mes empodera y independiente den actividad economico, recreativo y di desaroyo personal. Viviendanan adecua caminda nan cuido diario por ta brinda y e atencion mereci ta duna, ta un punto cu no mester ta di discusion y no por ta poni na peliger bao di ningun circunstancia y mucho menos pa motibo politico.
Nos como e populacion cu actualmente ta trahando tin e deber di no solamente cumpli cu nos Grandinan, pero tambe inspira nos hubentud creciente pa nan por t’e mihor version di nan mes tur dia. Di e forma aki e curso natural di bida y cuido por sigui carga den e decadanan venidero. E inspiracion aki ta cuminsa y continua diariamente den cada relacionan humano cu nos ta crea cu otro sin importa edad y con nos ta fortalece e norma y balor cu ta traspasa den nos relacion cu otro. Cu e norma y balor aki nos lo sigui crea e pais caminda biba un bida dignamente t’e punto di salida pa cada un di nos cu ta para firme pa humanidad y cada faceta di bida cu e ser humano ta encontra den su trayectoria.
Laga nos para pa un Comunidad Nobo, un Comunidad Uni.
