Willemstad, Curaçao – Senador di Eerste Kamer pa D66, Boris Dittrich ta introdusi Miembro di Parlamento pa PNP, Gwendell Mercelina Jr. pa representá Kòrsou den e plataforma internashonal di Parliamentarians for Global Action (PGA).
Boris Dittrich ta un politiko, abogado, aktivista di derecho humano i outor di Hulanda. For di 1994 pa 2006, Dittrich tabata miembro di Tweede Kamer pa e partido Democraten 66 (D66) unda el a sirbi tambe komo lider di partido i frakshon for di 2003 te ku 2006. Den parlamento el a enfoká riba derechonan humano, imigrashon, maneho di asilo, hustisia, i derechonan di LGBT. Dittrich a biba tambe na Merka, unda el a traha komo direktor di abogasia pa e departamentu Minoria Seksual di Human Rights Watch na New York. For di yüni 2019 ta miembro di Eerste Kamer der Staten-Generaal pa Democraten 66 (D66).
Dittrich ta di opinion ku Mercelina su vishon i kompromiso fuerte pa promové igualdat di genero, proteha e estado di derecho, demokrasia, medio ambiente, kambio di klima i otro topikonan importante riba un skala global, ta hasi Mercelina e parlamentario apto pa representá Kòrsou su miembresía den e organisashon prestigioso aki.
PGA ta un ret global di mas ku 1,300 parlamentario for di alrededor 140 pais ku ta dediká pa promové pas, demokrasia, derecho humano i e estado di derecho. E organisashon ta yuda parlamentarionan traha hunto pa trata ku e desafionan mas urgente di mundu i pa promové desaroyo sostenibel.
“Mi ta sintimi honrá pa keda introdusí na Parliamentarians for Global Action (PGA) pa senador i legendario Boris Dittrich.” Mercelina a bisa. ”Mi ta entusiasmá ku e oportunidat pa traha hunto ku hende ku tin e mesun pensamentu pa promové kambio positivo i hasi un impakto bèrdadero den bida di hende mundialmente.”
Mercelina su invershonnan den fortifiká Kòrsou su ròl den IPKO (Interparlamentair Koninkrijksoverleg), region i internashonalmente ta duna fruta ora bo mira oportunidatnan asinaki presentá ku ta amplia e oportunidatnan, bos i representashon di Kòrsou. Ku su ròl komo representante di pueblo den kuadro di diplomasia parlamentario e lo sigui asistí eventonan di PGA i traha hunto ku otro parlamentarionan pa promové kambionan positivo.
Banda di e representashon den Parliamentarians for Global Action (PGA), Mercelina ta ko-fundado di Parliamentary Observatory on Climate Change and Just Transition (OPCC), e ta embahador di One Young World i Island Innovation kual ta un prestashon úniko global di un Yu di Kòrsou.
