Diamars juni 25 ultimo, tabata tin e reunion publico di e prome presupuesto supletorio 2024. Durante di e reunion publico aki fraccion di MEP y Raiz a presenta un mocion pa urgi gobierno cu lo siguiente; “Pa Gobierno di Aruba dentro di un cuadro financiero responsabel y husto, stimula e bienestar y trankilidad di nos adultonan mayor: por medio di adaptacion di e lista positivo di remedinan di AZV segun analisis di AZV, den forma di rebaho of exclusion pa adulto mayor.”
Mocion di MEP-Raiz pa baha of kita lista positivo di remedi a keda aproba
Mirando cu e posicion di nos pais ta stabilisando y cu pa di dos biaha por papia di un surplus grandi pa paga e debe nacional y haci inversionnan, gobierno a dicidi pa introduci bek beneficionan pa asina pueblo por acapara cu e poder di compra perdi.
Den cuadro di esaki fraccion di MEP y Raiz a presenta un mocion cu a wordo aproba pa Parlamento pa AZV haci un analisis si por rebaha of kita e lista positivo di remedinan pa nos grandinan. Ta conoci cu e fondonan di AZV aworaki tambe a wordo stabilisa y ta generando fondonan di reserva pa e gastonan miyonario di “vergrijzing” cu e pais ta bay hay’e confronta cu ne aki algun aña.
AZV mester tuma un decision responsabel
Aña 2023 tabata e prome aña despues di e Pandemia di Covid-19 cu Aruba a recupera economicamente, a kibra recordnan turistico, a produci su prome surplus, y tambe su prome pago gigante riba e mega debe, cual tabata un suma di 153 miyon florin. Ademas, AZV tambe a conoce fondonan adicional pa pone como reserva mirando cu den futuro su presupuesto lo aumenta cu e reto creciente di ciudadanonan cu ta bay tin 65+ aña di edad. Den cuadro di esaki AZV mester bay haci un analisis kico tur por haci cu e mocion di MEP-Raiz, si ta bay baha of kita remedinan pa pensionadonan for di e lista positivo respectivamente.
E decision cu AZV lo bay haci mester keda den e cuadro di un maneho sostenibel y responsabel. E yabi di sostenibilidad mester keda bon maneho, pa asina sigura e existencia di AZV y tambe e posibilidad pa nos ciudadanonan por sigui disfruta di e seguro medico aki.
Vision y recuperacion
Berlos ta bisa cu Aruba a pasa momentonan extraordinariamente dificil durante pandemia, cual a kibra famianan, negoshinan, fondo publico, turismo y Aruba su economia. “Sinembargo, bao di e liderazgo di nos prome minister y su gabinete nos a wak Aruba lanta cabes atrobe. Instancianan manera IMF a keda asombra di nos progreso y resilencia y a categorisa nos recuperacion como e miho den e region. EBA a declara cu Aruba ta number 1 pa su Clima di Inversion. Fitch y Moodys a bay di acuerdo cu IMF su declaracion y nan analisis a resulta den un “upgrading” di nos credit rating, cu a bira un “grading” di inversion. Asina tambe CAft a elogia maneho di gobierno su finansa publico y a aprob’e. Aruba ta recuperando, gobierno ta restaurando beneficionan, poder di compra, pagando e mega debe, kibrando record den turismo, logrando un desempleo historico di 4%, a aumenta indexering cu 11.7%, ta paga pa trahadonan di fundacionnan 2.8 miyon, lo bay aumenta uitkering pa personanan handicap y awor ta analisando si por kita of rebaha e remedinan di e lista positivo pa nos pensionadonan.”
