E topico di matrimonio di mesun sexo a bin hopi biaha dilanti. E miembronan di Eerste y Tweede Kamer a vocifera nan opinion riba e punto aki. Hulanda no por impone riba e islanan pa acepta matrimonio di mesun sexo, pero ta haya cu si por discuti riba e topico y purba yega na solucion.
Jeroen Recourt, miembro di Eerste Kamer (PvdA), a splica cu ta bon pa laga hende bisa loke nan ta sinti di esaki y e mester ta atendi n’e pais mes. Cu na Aruba ta discutiendo riba e topico aki, cual no ta prome biaha, ta bon. E ta un topico cu tin diferente opinion riba dje.
Recourt ta pro e casamento di mesun sexo y ta haya cu tur hende ta igual, pero otro persona tin otro pensamento. E ta haya bon cu aki na Aruba ta tratando e topico. E kier mira resultado dje decision di hues, e ta hopi curioso con e ta sigui. Cu gobierno ta bay casacion, el a splica cu tipo di discusion asina tambe ta haya na Hulanda ora cu hues ta tuma cierto decision unda tin di haber cu politica. Aunke hopi biaha hues no ta cay den politica y ta bisa solamente algo ora e tema ta dificil, manera den e caso aki.
E ta haya bon cu na Aruba ta discutiendo e puntonan aki. Aruba mes mester discuti riba casamento di mesun sexo, di cual e ta spera cu e bay miho pa introduccion y e traha miho compara cu na Hulanda.
Mariëlle Paul, miembro di Tweede Kamer (VVD), a expresa cu e parlamentarionan di Hulanda ta haya sumamente importante como derecho di ciudadano pa sa ken bo ta, ken bo ta stima esun cu bo kier, di tin e libertad pa experencia. Esey ta un derecho fundamental. Nan tin e preocupacion cu tur caminda no ta asina.
Prome minister di Hulanda a indica na december cu nan no por obliga e islanan acepta matrimonio di mesun sexo. Paul ta di acuerdo cu esaki, pero di otro banda por percura pa papia di e topico aki. Pa loke ta trata e parti di libertad, esaki ta coresponde na hende di ken e ta, ken e ta stima, y na final e derecho di homosexual tambe ta respeta.
Jorien Wuite, miembro di Tweede Kamer (D66), a indica di a trata diferente tema durante e reunion di IPKO y den nan ta e topico di matrimonio di mesun sexo. Na Hulanda e topico aki tambe tabatin discrepancia y a traha riba e derecho di cada un. E ta lamenta cu e proceso ta bay casacion, pero di otro banda na Aruba a bin cu ley di iniciativa. E ta sinti esaki como un speransa, pero ta haya cu mester papia cu otro y trata e puntonan importante cu e tema aki.
Durante IPKO ta atende cu diferente punto, pero no ta di awe pa mañan ta yega na un solucion. E bon ta cu a cuminsa papia di nan y esey ta duna un miho base con pa yega na solucion.
Sylvana Simons, miembro di Tweede Kamer (BIJ1), a splica nan ta un partido progresivo y ta para pa nan ideologia, y esey ta inclui matrimonio di mesun sexo. Na mes momento nan mester tene cuidou pa no sali fo’i un emancipacion di Hulanda, cu desde trempan tabata introduci na Hulanda, y cuminsa haci demanda unda stroba e proceso ey. Bo no ta forsa cierto cos, pero bo ta facilita nan. Ta papia hunto y na final esun cu no ta di acuerdo lo yega na conclusion cu cada ken tin derecho di stima ken e kier. Asina ey lo yega na e derecho di matrimonio di mesun sexo.
