Diaranson merdia Parlamentario Croes a entrega un carta na Su Excelencia Gobernador Alfonso Boekhoudt caminda ta denuncia e ocasion mas reciente den cual Gabinete Wever-Croes II ta viola e reglanan di procesonan di ley ancra den nos constitucion.
Parlamentario independiente mr. drs. Ryçond Santos do Nascimento a compaña Croes ya cu e tambe ta para tras di e mesun un ponencia y ta co-firmante di e documento. Mientras e siman aki gobierno ta activo politicamente celebrando integridad, di otro banda ta demostra un falta fragante di respet pa Parlamento di Aruba y nos constitucion, segun Croes.
![](https://24ora.com/wp-content/uploads/2023/12/photo-36-1463x1440.jpg)
Den e miho estilo di Cha Tiger y haciendo uzo di mayoria den coalicion y presidencia di Parlamento, e partidonan MEP y RAIZ e siman aki a manda un bundel di ley relaciona cu entre otro cambio di presupuesto di DOW pa 2023, sin cu a laga tur e leynan aki pasa na Raad van Advies pa su evaluacion y conseho.
Den e bundel presenta tin e Presupuesto Supletorio di Pais Aruba, e Presupuesto di Parlamento di Aruba y un cambio riba presupuesto di Departamento di Obranan Publico (DOW). Ta den e ultimo aki, a core hinca un suma na ultimo ora, sin cu el a cana e procedura legal manera cu si nan a laga haci cu e otro dos leynan menciona.
![](https://24ora.com/wp-content/uploads/2023/12/WhatsApp-Image-2023-12-07-at-9.21.52-AM.jpeg)
![](https://24ora.com/wp-content/uploads/2023/12/WhatsApp-Image-2023-12-07-at-9.21.51-AM-1018x1440.jpeg)
Mas specificamente, ta trata di un cambio den e presupuesto di 2023 pa DOW caminda ta bin cu 1.2 miyon florin adicional pa atende asunto di incinerado na Parkietenbos y mantencion di speelplaatsen.
Ley ta prescribi cu un proceso di cambio di ley asina mester inclui conseho di Raad van Advies, esey no a sosode. Segun Parlamentario Croes, esaki t’e mesun modus operandi cu Gabinete Wever-Croes tabatin caba na fin di 2022 y pa cual tur fraccion di oposicion a bay den protesta.