Dialuna mainta a habri cu reunion den parlamento pa trata aumento di costo di bida. E peticion aki a bin di parti Mike Eman cual ta e lider di Fraccion di AVP. Cu anticipacion tanto e fraccion di MEP como Prome Minister a duna señal riba red social, cu e reunion aki lo bira un debate candente entre e partidonan den staten.
Desde augustus AVP ta pidiendo p’e reunion aki, pasobra den pueblo tin sufrimento y señal serio di pobresa, acompaña pa hopi sacrificio pa asina mantene cabes riba awa. Costo di bida a bira impagabel riba nos isla. Tin 22 mil pensionado y e placa no ta yega. E pobresa bou di nos grandinan, ta uno alarmante.
Durante reunion a hiba palabra como parlamentario Edgard Vrolijk, en bes di presidente di parlamento, e biaha aki. No a reserva di duna su opinion riba e situacion y ken ta causante di locual ta tumando luga riba Aruba.
Segun Vrolijk no por insinua cu tur cos ta culpa di e gobierno aki, manera caha di orgel ta draai e ponencia aki cada rato. E mesun ‘cantaleta’cu no ta contribui cu nada.
Di otro banda, e hala di Old School cu a vota pa Benny, a entrega opstel cla skirbi caba pa Mervin Wyatt Ras y ni asina por a evita tur eror cu el a haci pa lesa esaki. Vrolijk a laga sa cu e old school su meta ta di oprimi e generacion nobo den politica, e ‘new young blood’di cual un di nan a bandona e partido caba, echo cu e ta aplaudi y sostene tambe como cu el a actua cu integridad y curashi.
Mientrastanto den reunion di awe a atende cu cuater punto, esta pandemia, guera di Ucrania y e desaster natural yama Mike Eman cu su famoso plan di rescate cu e ta cana rond cu ne.
Den bista di Edgard Vrolijk, na momento cu Eman duna di conoce cu e lo sinta cu gremio ta algo cu mester teme y na mes momento wanta saco pasobra lo enrikece nan mes, nan lo bira ‘stinkend rijk’mientras e pueblo ta bira stinkend arm. Cual ta e forma con Eman ta traha, di haci e pueblo pober pa despues e bin duna un kruimeltje pa sigui vota p’e. Cumpra hende di nan dolor, cual ta abuso di pueblo.
