Den un reunion publico den Parlamento, miembro di fraccion di MAS, parlamentario Aquannette Gunn a atende varios punto crucial relaciona cu e presupuesto supletorio, destacando e impactonan economico y social di tarifanan nobo pa turista y e aumentonan salarial premira pa diferente sector.
Gunn a subraya e reciente aprobacion parlamentario di un tarifa di 20 dollar cu cada turista mester paga ora nan yena e ED-Card na nan yegada na Aruba. Fuera di esey, el a menciona cu den 2024 lo introduci otro tarifa di 15 dollar como parti di e fondo di “pandemische veerkracht en innovatie”. E medida aki ta busca pa financia e privatisacion di Directie Luchtvaart, permitiendo asina cumpli cu e exigencianan internacional mediante fondo adicional aporta p’e turistanan.
E parlamentario tambe a destaca e promesa di e prome mandatario di un aumento salarial pa seis grupo di e comunidad entrante prome di juli. Esaki ta inclui e docentenan, kendenan lo ricibi un aumento di 6% na juli, sigui pa otro 5,7% na januari di 2025. Sinembargo Gunn a expresa preocupacion riba con lo aplica e aumentonan aki n’e empleadonan administrativo y e trahadonan di e fundacionnan cu ta depende completamente di subsidio di gobierno.
Gunn a cuestiona e factibilidad di implementa e aumentonan salarial aki p’e fundacionnan cu ta opera casi exclusivamente cu subsidio di gobierno. El a destaca cu, aunke e gobierno a calcula un presupuesto di 2.8 miyon pa apoya e fundacionnan aki na 2024, e ta sigui ta insigur con e institucionnan aki lo por cubri e aumento adicional di 5,7% entrante januari 2025. E parlamentario, a boga gobierno pa evalua e aumentonan aki p’e entidadnan manera SABA, cu ta depende 100% di subsidio di gobierno.
E Parlamentario tambe a menciona e falta di claridad encuanto e aumentonan salarial p’e personanan cu discapacidad y e pensionadonan. Gunn a pidi pa detaye riba e aumento den e “reparatietoeslag” di 170 florin cu e pensionadonan, exigiendo un cifra concreto di e aumento di presupuesto.
Gunn a cera su intervencion pidiendo mayor claridad y transparencia di parti di gobierno den e implementacion di e medidanan economico y social nobo. El a subraya e necesidad di un enfoke balansa cu ta garantisa e sostenibilidad financiero di e factibilidad financiero di e institucionnan dependiente di subsidio y e siguridad p’e ciudadanonan afecta p’e cambionan aki.
