A traves di Presidente di Parlamento, miembro di fraccion di partido MAS, Aquannette Gunn, a haci un serie di pregunta n’e Minister di Asunto Economico, Comunicacion y Desaroyo Sostenibel, mr. Geoffrey Wever, pa loke ta trata e fenomeno di e aumento di prijs di gasolin.
E Parlamentario a indica cu durante e ‘Encuentro Publico’ nr. 4, cu a tuma luga dia 14 di februari, Minister Wever a elabora tocante e motibo p’e aumento di prijs di gasolin.
E mandatario a indica cu e aumento aki no ta debi solamente door di e desaroyo di e prijs di crudo internacional, pero cu e biaha aki tin un componente adicional cual t’e gastonan bancario cu e doñonan di ‘pompstation’ ta haya nan confronta cu ne.
E comerciantenan a indica cu pa cada transaccion bancario, banco ta cobra entre 3 pa 4%. E doñonan a expresa cu e gastonan aki lo ta funesto pa nan, debi n’e echo cu ta gobierno ta determina nan ganashi. Y cu den nan caso, e gastonan bancario aki no por pasa p’e clientela y cu nan tin cu suprimi’e. Esaki lo trece como consecuencia cu e comerciantenan lo bati bancarota of no lo acepta e carchinan di banco mas.
E mandatario a indica cu e situacion ta uno hopi dificil y cu riba 13 di februari su persona a firma un ‘Ministeriële Regeling’ na unda un parti di e ahustacion ta pa suprimi e gastonan bancario cu e comerciantenan a haya nan confronta cu ne.
Den cuadro pa haya mas claridad riba e disertacion di e mandatario Wever den Parlamento tocante e asunto di aumento di prijs di gasolin Parlamentario Gunn ta haci uzo di su derecho pa haci e siguiente preguntanan.
1. Minister por informa Parlamento den detaye ki porcentahe/cuanto cen di e aumento di e diferente productonan deriva di petroleo (gasolin/diesel/kerosin) a keda asigna n’e asociacion Aruba Gasoline Dealers?
2. Minister por informa Parlamento a base di cua articulo di cua Ley e banconan ta cobra e porcentahe aki na comercio?
Minister a declara den un entrevista na un medio di comunicacion cu si e pompstationnan lo a bay over na cash, esaki lo a crea un caos completo, p’esey Gobierno a dicidi di duna nan e aumento adicional pa loke t’e gastonan di banco.
3. Minister por elabora mas detaya dicon su persona ta di opinion cu si e comerciantenan di gasoline station bay over na cash esaki lo crea un caos completo?
4. Minister por informa Parlamento kico ta su pensamento p’e posicion di e Asociacion di Banconan tocante nan decision imponi riba comercio?
5. Minister por informa Parlamento si su ministerio lo haci un estudio profundo cu tur e actornan envolvi (e.o: asociacion bancario, asociacion di e gasoline dealers y gremionan comercial) con lo por yega na un miho decision pa HENTER comunidad y no simplemente suprimi e gastonan cu banconan a impone riba comercio?
6. Minister por informa Parlamento pa cuanto tempo e ‘Ministeriële Regeling’ firma dia 13 ultimo lo keda vigente?
7. Minister por comparti cu Parlamento e ‘Ministeriële Regeling’ cu su persona a firma riba 13 di februari 2024?
Minister a duna di conoce cu e banconan a switch via un plataforma internacional y e banconan a haya nan confronta cu dicho gastonan. Ademas ta un echo cu ora tin aumento den e prijs di gasolin/diesel esaki lo refleha den e prijsnan (comercio).
Den caso di comerciantenan di gasoline stationnan no tin e libertad di traspasa e gastonan bancario p’e clientela, pero e demas comerciantenan si tin e opcion ey (Free Enterprise)!!! Pues den e caso aki nos por considera e gastonan bancario di entre 3 a 4% y e aumento di prijs di combustibel como un dobel inflacion. Pues sea e consumidor dicidi di paga cash of swipe den por ehempel un supermercado ya e comerciante a sa di traspasa e gasto specifico aki den e prijs di e productonan.
8. Minister por informa Parlamento desde ki tempo e gastonan bancario di entre 3 a 4% cada bes cu e cliente swipe a drenta na vigor?
9. Minister por informa Parlamento kico lo ta su plan di accion relaciona cu e desaroyo aki, pa asina trata di mitiga e impacto negativo mas ainda den e forsa di compra bou nos Pueblo, irespecto di e echo cu nos tin un mercado liber?
Parlamentario Gunn ta sumamente preocupa p’e fenomeno aki, debi n’e echo cu na final un biaha mas, t’e pueblo t’esun cu ta absorba e gastonan adicional. Esaki tin un impacto negativo mas ainda den e forsa di compra di nos Pueblo!
