Fundacion Parke Nacional Arikok a lansa oficialmente e prome competencia di fotografia cu e fundacion ta organisa. Esaki ta den colaboracion hunto cu ARTN Photography y Aruba Bank.
Segun Carl Quant, sales marketing and communications manager di e Fundacion, e competencia aki ta conta cu dos categoria. Tin e categoria te cu 17 aña pa nos muchanan, caminda cu lo saca e ora e Young Nature Photographer of the Year, y tambe pa e categoria di adulto cu ta 18 aña bay ariba, cual lo ta e Nature Photographer of the Year pa 2020.
E competencia mes ta haci’e lucrativo, pa personanan cu ta pensa cu nan tin e pasion y interes pa fotografia, a asocia cu Ayrton Tromp di ARTN Photography, unda cu e lo ofrece un Zoom Workshop full digital, y esaki lo tuma luga diamars otro siman, pa 6’or y mey di atardi.
Lo publica tur link y informacion y rekisitonan pa por participa na e competencia aki via website di e fundacion y pagina di Facebook, caminda cu tur hende cu tin interes por participa den e competencia aki.
Director di ARTN Photography y fotografo, Ayrton Tromp, a splica cu desde principio cu Parke Arikok a acerk’e pa join nan cu e proyecto aki, el a sinti su mes hopi emociona y contento, pasobra e mes ta stima naturalesa masha hopi mes y Aruba ta un pais asina bunita cu tin hopi pa ofrece. Hustamente e flora y fauna di Aruba ta loke a haci Tromp un fotografo awe, cual e ta super gradicido na esey.
Trabao di Tromp ta den e competencia aki como un fotografo profesional local pa yuda e participantenan. Ta dunando un tayer otro siman diamars pa 6’or y mey, cual ta uno virtual, manera ya menciona, unda cu tur e participantenan ta mas cu bon bini pa participa.
Den e tayer aki lo tin tipnan pa fotografia, con pa saca un miho potret, con pa ta un miho fotografo. Ta tipnan cu por yuda participa cu un mas miho potret.
Di parti di Aruba Bank, Roxanne Croes, marketing officer, a splica cu na momento cu Parke a acerca nan cu e proyecto nan tabata hopi interesa pa participa. E ta algo hopi positivo, en particular den e temporada aki.
Ora cu wak cu no ta algo solamente pa adulto pero tambe pa e hoben, cu e por desaroya su conocemento riba e area di fotografia.
Como banco, ta sostene proyectonan asina y ta kere den nan. P’esey Aruba Bank ta invita pueblo di Aruba, no solamente e adulto pero tambe e hoben pa participa, forma parti di e tayer y despues saca potret y haci uzo di e bunita naturalesa cu nos tin awor aki. Awasero a yobe asina hopi y naturalesa ta asina bunita. Ta invita pueblo henter pa participa.
Premio principal di e proyecto aki ta 500 florin. Sigur e ta hopi atractivo. Tin tanto pa e adulto como pa e hoben. Un premio asina ta cay hopi bon den e temporada, Croes a bisa por ultimo.
