Cu Dienst Openbare Werken (DOW) ta practica faboritismo cu dunamento di permiso pa “verfraaiing” no tin ningun duda! Pero cu doñonan di cas ta haya nan mes obliga na proteha nan propiedad, tambe ta un echo! Esey ta varios di e reaccionnan ricibi for di habitantenan rond di e area di Malmok y Arashi. E maneho estilo “wild wild west” cu DOW ta aplicando no ta duna nan mucho opcion.
Di un banda ta nota cu bisiña ta haya aprobacion pa embeyece dilanti nan cas y consecuentemente ta medio rek nan cura bay afo. Esun ta cera e espacio y e otro ta lag’e habri. Niun hende ta controla y asina ta crea un percepcion cu tin faboritismo den ororgamento di e tipo di permisonan asina.
Verfraaiing ta encera cu e habitante ta pidi permiso pa pone poco baki di mata cu flor of si por pone yerba dilanti su cas, etc. DOW normalmente mester duna e permiso aki, basa eiba estetica y e situacion den cada bario. Pero no por ta asina cu un bisiña ta haya y e otro no. Mester tene cuenta tambe cu ora duna un, ta habri caminda pa henter e caya pidi e mesun excepcion ey, cu tur consecuencia pa e maneho di e supuesto “rooi lijn” cu mester core mescos.
Rooi lijn ta e liña imaginatorio cu ta core dilanto y na banda di tur cas of edificio. Dilanti, di bo cura pf tereno te bo propiedad mester tin cinco meter mientras cu den banda ta varia entre dos pa dos meter y mey. E reto ta cu si, den verfraaiing, bo uza e mesun klinkernan te pafo, e ta crea e impresion cu ta bo tereno e ta.
Den e caso specifico na Malmok, e bisiñanan tin basta problema cu e vehiculonan UTV cu ta yega para dilanti nan cas. Specialmente esunnan cerca di Tres Trapi, Boca Catalina y Arashi regularmente ta lanta mainta cu como 20 mashin asina para dilanti cas, cu azeta bashando den nan porta y holo di gasolin. Daña tur nan acera y duna un impresion masha mahos mes den nan port’i cas.
Como cu Gobierno no tin fin di regula e vehiculonan aki, hopi habitante den e area a cuminsa haci loke ta necesario pa proteha nan propiedad. Di un banda ta critica pa e echo cu ta pone pion dilanti nan cas, pero nan ta argumenta cu a haci excepcion pa tur hotel, negoshi y mall, pa e mesun motibo. A splica cu no a traha un cura sino mas bien a pone pion cu ta facilita cu peaton por cana sin problema. Ta vehiculonan di motor cu ta uza nan acera como parleerplaats ta e problema.
Por menciona cu den fin di siman, ta hopi comentario tabatin riba red social. DOW ta blanco di critica pa haci excepcion den barionan residencial. Asina ta menciona cu a duna permiso pa construi un edificio di cuater piso pa condomonio, contra reglanan estableci den ROPV y den welstand commissie. Parce cu DOW hopi biaha no ta honra e conseho duna di e dos entidadnan aki y ta “dal bay” numa cu e proyecto.
