E Bijbel ta e Palabra di Dios, aunke bo ta tende un par di sabi ta bisa cu ta hende a skirbi e Bijbel, toch nos kier remarca cu Bijbel a wordo skirbi pa hende pero guia door di e Spirito di Dios.
*Anto tin cosnan cu Bijbel ta proclama, cu aunke hende cambia nan nomber toch e ta keda igual pasobra tur locual ta para skirbi den Bijbel ta cumpliendo letter pa letter, pasobra Dios no ta ekiboca Su mes.
*P’esey ta masha importante pa tur hende kere den Cristo Hesus como Señor y Salbador y lesa nan Bijbel.
Bijbel ta cuminsa bisa nos den 2 Pedro 3;7-10 lo siguiente:
Ma shelo y tera actual pa medio di Su palabra ta wordo reserva pa candela, warda pa e dia di huicio y destruccion di hendenan impuro.
Señor no ta tarda cu Su promesa manera algun tin esaki como tardansa, E tin pasenshi pa cu boso, y no kier pa ningun hende bay perdi, ma pa tur bini na repentimento.
Ma e dia di Señor lo bin manera un ladron,den cual e shelonan lo pasa bay cu un boroto inmenso, y e elementonan lo wordo destrui cu un calor intenso y e tera y su obranan lo wordo kima completamente.
Ojo!!! Laga nos tene bon cuenta cu locual hende ta yama Cambio Climatico, ta simplemente e comienso di locual Dios ta bay haci, y si tempo calma ta pa duna hende tempo pa arepenti y yega na conocemento di e Berdad.
Y Bijbel ta sigui relata:Como cu tur e cosnan aki lo wordo destrui di e manera aki,ki sorto di hende boso mester ta den un conducta santo y devoto, sperando y purando e binida di e dia di Dios, pa cual motibo e shelonan lo wordo destrui door di kimamento y e elementonan lo dirti door calor intenso.
Esaki no ta un topico pa spanta hende, pero un berdad pa cambia bida di hende, pasobra hopi hende ta bibando den filosofia,of den nan mes mundo, caminda maldad,inmoralidad y abominacion ta goberna y nan no kier tene cuenta cu e berdad di Dios, y ta rechasa su Palabra completamente.
*Ta hopi ta esunnan cu ta asina sabi cu nan ta kere cu nan poder militar, nan por destrui otro paisnan cu bom y misilnan di largo alcance. Cuanto gobierno rond mundo no ta inverti den tur tipo di arma nuclear mientras cu den e pais mes tur caminda bo ta ripara cu tin hende cu hamber y necesidad.
*P’esey Dios ta bolbe avisa den su palabra, kico lo pasa cu esunnan y ta pasando cu esunnan cu ta rechasa Dios. P’esey nos mester tene bon cuenta locual ta para skirbi den Romanonan 1:24-25 bisando: Ta p’esey tambe Dios a entrega nan na impuresa, den pasionnan di nan cu rason, pa nan cu nan deshonra nan mes curpa. Pasobra nan a cambia e berdad di Dios pa un mentira y a adora y sirbi e criatura en bes di e Creador, Kende ta bendiciona pa semper Amen.
*Pakico e nacionnan mester puntra : Unda Dios a keda awor? Ma nos Dios ta den e shelonan y ta haci tur loke ta agrad’E.
E oportunidad cu Dios ta ofrece nan mundo completo ainda ta vigente pasobra Dios ta stima tur hende; Pasobra Dios a stima mundo asina ta tanto e a duna Su Yiu unigenito pa ken cu kere den dj’E no bay perdi ma tin bida eterno. ( Juan 3:16).
No ta tempo pa ningun hende gamble mas cu nan bida.
Skirbi pa Pastoor Marcel Balootje
