Roberto Jose Avalo Malave ta un estilista local y cual soño di ta un estilista den Miss Universo a bira un realidad.
Na juli 2023, el a bay y forma parti di un casting sumamento duro, di 125 persona. Un casting sumamente duro, cu hendenan di diferente parti di mundo y cu hopi esfuerso y dedicacion el a logra cay den e top 6. Lamentablemente, aña pasa e no a haya e oportunidad pa briya y pa universo wak su trabou. Pero e aña aki, 2024, Republica Dominicana tabata na e luga perfecto y ideal pa e soño aki haya forma y haya su luga. E aña aki atrobe el a competi, pa di dos biaha, cu 50 estilista di tur parti di mundo. E reto tabata mesun dificil, mesun duro, mesun fuerte, pero perseverancia y constancia mester prevalece. E mas importante, e confiansa den bo mes nunca bo mester perd’e.
Aki ta e resultado di dos aña di trabou duro, preparando pa e proceso aki y awo, porfin por bisa cu “a logr’e!” Aruba a haya su prome estilista na Miss Universo.
Awor tin asina hopi cos, asina hopi oportunidad ta habri riba e caminda, pero e cos di mas importante ta pa ta enfoca pa duna un mensahe positivo, pa mustra kico Aruba su industria di beyesa tin pa duna henter mundo. Avalos a sigui bisa “mi ta contento cu e representacion aki, cu mi trabou den Miss Universe lo ta un storia bunita pa e historia di beyesa di Aruba como pais. Taryn Mansell a cuminsa skirbi e historia y Roberto Avalos lo sigui skirbi e historia pa yuda Aruba yega mas leu den Miss Universo.”
Como un inmigrante Venezolano, no ta facil pa bisa cu por logra haya un luga den un sociedad caminda e ta nobo. Den 11 aña cu e tin na Aruba, el a traha hopi duro pa logra na e punto cu e ta actualmente, doño di su mesun negoshi, persona conoci pa su trabou den mundo di beyesa di Aruba. Actualmente trahando cu Prome Minister mr. Evelyn Wever-Croes y recientemente, cu diferente organisacion di beyesa na Aruba.
Mas aleu, Avalo a indica cu esaki ta solamente e comienso di e mensahe positivo cu e kier trece dilanti como persona, como humano, como inmigrante. Pero mas cu tur cos pa duna bek na e pais cu awo e ta yama cas, tur locual el a dun’e den e proceso, cu a yud’e, apoy’e y cu a kere den dje. Roberto lo compaña Miss Aruba den e mesun universo aki.
Por ultimo, Avalo a indica cu e no por laga afo, e pueblo di Republica Dominicana, cu a habri su portanan pa tur e participantenan cu a bay competi eynan. Na mes momento, e grupo di trabou cu a organisa e Master Class aki, Lidiana Rodríguez, e doño, Andrés Felipe Cabrera, cu ta haci e soño di tur e artista- y estilistanan un realidad.
Sigur Miss Universe ta nifica hopi pa hopi hende, pero pa nos como estilista cu semper ta tras di cortina, aki sigur tin un plataforma cu ta yuda nan den nan carera, pa bira mas grandi ainda, mas productivo y mas cu tur cos, mas rendabel pa nan circulo .E ta sumamente agradecido pa e oportunidad aki.
El a finalisa bisando:“Si ami a logra mi soño aki, abo tambe por. Nunca duda den bo mes.”
